Bochanmi Republican upa pahnih Senator Lindsay Graham le John McCain nih President Trump Muslim khamnak cu an vun dohpiak. An pahnih in biatung an chuahmi cu US lut kho lo ding in Muslim ram pasarih a khammi hi 'a rianrang tuk thil a si' pinah 'a tihnung tukmi khuakhan a si' an ti.
Graham le McCain nih a chim thanmi cu 'President Trump nih Muslim a khammi hna hi tha tein ruat hmasa loin a tuahmi a si. Kan ramchung airport tiangah buainak a chuahter. Kan ram nih kan dir pimi zalonnak nunphung zong a ralchanh i lehrulnak kan tong ve te lai' tiah a chim.
A chim thanmi cu 'hremnak le tuarnak phun kip a tongmi refugee hngakchia le nu hna hi kan hnulei ah kan chit hna ding an si lo. Kan ram caah tihnung an si lo timi cu an hlathlai dih hnu ah kan theihmi an si ko. Tapung kan doh kan ti lioah hi bantukin President Nawlngeihnak hi kanmah le kanmah harnak kan i pek hna a si sual lai maw' an ti.
Hi bantuk nawlngeihnak chuah hi kan ramchung ah Muslim ram kan duh hna lo ti he aa khat. Kan thinphan khunmi cu tapung riantuannak a zualter chin lengmang sual lai ti hi a si tiah an chim chih.
President Trump nih a phomh ve hna. 'Ralpi Pathumnak chuahter aa timmi an si. John McCain le Lindsey Graham nih biatung an chuahmi hi a hmaan lomi a si. Mipem kongah an derthawm tuk hringhran. ISIS, ramri security le mipem dohnak kongah hin an pahnih in thazaang tu an chuah deuh ding a si a ti ve hna.
Ningani ah President Trump nih President nawlngeihnak in min a thutmi cu ni 120 chung US ah zeibantuk refugee hmanh an lut lai lo ti a si. Thla thum chung US ah a lut rih lo dingmi tiah min char in a thimmi hna cu Iraq, Syria, Iran, Sudan, Libya, Somalia le Yemen.
President Trump minthutmi an vun zulh colh tikah airport kip ah fak tuk in buainak a chuak. Asinain New York i Federal biaceihtu nih a vun tlangtlak colh hna i, khirh than ding timi hna cu an ngolhter chung hna. Department of Homeland Security lei nih an chimmi cu 'President Trump nawlchuahmi an kham thlu lai lo. Zulh than an si te ko lai' an ti. Ref: The sun.
President Trump Nih Muslim Kongah A Lungput Thumh A Tim Lo
---------------------