President thimmi Donald Trump nih James Mattis (Mad Dog ti zong in an auhmi) cu Defence Secretary caah a thim. Nilini ah Senate ah fehternak an tuah lioah Russia kong fak ngaiin a chim i, Trump he an i kalh colh. Jerusalem ah US embassy thial ding timi zong an ruahnak aa dang hna.
Congress chungtel a simi Republican upa cheukhat nih cun Jerusalem ah US embassy kan thial lai an ti. President thimmi Donald Trump zong nih US embassy ka thial lai a ti. Asinain Mattis nih cun 'Senate Armed Service Committee hmaiah a chimmi cu 'atu lio US policy ah ka um peng ko' a ti.
A chim duhmi cu 'Tel Aviv ah hin kan embassy cu um ko rih seh law Jerusalem ah cun kan thial lo ah a tha' a ti. Senator hna hmaiah biakamnak a tuah lioah bia an hal i a lehmi hna cu 'Atu tiang ah Israel khualipi cu Tel Aviv a si i, Israel cozah zong a umnak a si' tiah a leh hna. A chim thanmi cu 'thial le thial kong biakhiaktu cu ka si lo' a ti hna.
Bill Clinton in George W. Bush in President Obama chan tiang US embassy an thial lo. Israel le Palestinian karlak ah remhnak tling um hmasa seh ti an duh. Jerusalem kong cu kap hnih hnatlak in kan phisin hrimhrim a hau tiin atu tiang Jerusalem hi ahohmanh nih an tongh ngam bal lonak a si.
Trump nih cun kan thial lai a ti. Israel ah ambassador a thlahmi David Friedman zong nih a chimmi cu Tel Aviv in si loin Jerusalem in rian ka tuan cang lai tiah a ti.
Catialtu hmuh ning: Jerusalem hi kap hnih (Israel le Palestinian) hnatlak in phisin khawh dingmi a si lo. Jerusalem hi an siang veve lai lo. Cucaah Israel nih 1967 i Six Day War ah a rak lak ning tein US nih a dirkamh hna ahcun Israel kut ah a phan kho lai.
UN nih Israel ram a si ko tiah a cohlanpiak khawhnak ding zong ah US nih UN a tei a hau. Asinain Jerusalem hi Israel khualipi ah cohlan a si ni cu Arab ram an buai lai i an thinhung tuk ve lai. Zei tiang dah buainak an chuahter lai timi cu theih a si lo. Kap hnih hnatlak in Jerusalem kong kan phisin lai timi an hngah lengmangmi cu a um lomi hngah bantuk a si zungzal lai. Trump hi tuanbia tlengtuu a si ahcun a thlen te lai.