Ralkap lei upa thing General James Matties cu President thimmi Donald Trump nih a defence secretary caah a thim. Nilini ah Senate nih fehternak zong an tuah cang. Russia cungah Trump a nem tuk lioah James Mattis cu hran ngai dawh a si. Russia kongah a lungthinput fiang tein a langhter colh.
Senate Armed Service Committee hmaiah bia a chimmi cu 'Russia hi kan ram nunnak ca tiang in tih a nungmi an si i, US nih a thatnak in khua a khan lengmang ko buin Russia he hlawhtlinnak a chuah pimi a um lo khen a si. Russia he pehtlaihnak lam a bi chin lengmang i, dohdalnak lam tu a kau chin lengmang cang' a ti.
James Mattis hi U.S. Central Command ah commander a tuanmi a rak si i, NATO Supreme Allied zong ah commander a tuanmi a rak si. Nilini i bia a chim zong ah cun NATO thazaang pek a hauhnak le European an hawile dirkamh a herhnak a chim. Russia hi NATO thenkhuai aa tim pengmi a si' tiah a chim. Trump tu nih cun 'NATO cu a hlun cangmi a si' a rak ti.
'Ka hmuh ning le kaa tlaih pengmi cu hawi a ngeimi ram cu an nung peng i, hawi a ngei lomi cu an nung zungzal kho lo. Cucaah NATO he kan i pehtlaihnak kan pehzulh peng ding hi a herh tukmi a si' tiah Mattis nih a chim. 'Ralpi Pahnihnak hnu cun vawleicung kalnak lam hi doh peng a si cang. Russia cawlcanghnak in a siah tapung cawlcanghnak in a siah Taluk in an siah vawleicung hi a him ti lo a ti. Ref: VOA News.