Taluk le Russia cu US ralchanh in lungkhat in an vun dir than hoi. Vawleicung hi a kut cungah chiah peng a duh tiah Taluk le Russia nih hmun khat ah tho in an vun aukhuanh. South Korea he Terminal High Altitude Area Defense (THAAD) missile system runvennak dirh an timhmi cu an duh lo tuk.
US-South Korea nih THAAD Missile System dirh an timhmi hi Taluk caah a tihnung i, kan security ca tiang ah dawnkhantu a si. South Korea ah THAAD an chiah ahcun Asian ram ah tlukruannak a um kho lai lo. Cucaah US-South Korea khuakhan hi fak piin kan doh' tiah Taluk foreign minister Lu Kang nih a chim.
South Korea ah missile runvennak system sang taktakmi THAAD chiah ding in kan timhmi cu kan timh ning tein kan kal ko lai tiah US National Security Adviser Michael Flynn le National Security Office Chief, Kim Kwan-jin tonnak ah an chim. North Korea nuclear khamnak le runvennak caah chiah an timhmi a si.
Taluk le Russia nih cun North Korea leng tiang pi khin THAAD hi a thawng i hmual a ngeimi a si. Kan ramri hrawngah hi bantuk system sang chiah cu a tihnung ko an ti. South Korea ah THAAD chiah an timhmi hi Taluk le Russia tlaihhip a kan duh caah a si ko tiah kap hnih in an chim. 'Cuucaah kan ram pahnih in US-South Korea timhnak hi kan doh a hau ko' tiah Taluk leiin Victor Gao nih a chim. Ref: CNN.