Ningani ah President thimmi Donald Trump nih Taiwan kong a chimmi cu 'Taluk Pakhat Phung' (One China Policy) timi hi cabuai cungah ceih khawhmi a si a ti. Taluk forreign ministry lei upa nih a rannak in nirukni ah an vun leh colh ve.
Taluk nih Taiwan hi 'One China Policy' chungah kan chiah lengmangmi a si. Taiwan kong hi Trump nih a chim bantukin cabuai cungah ceih khawhmi a si lo. Taiwan hi Taluk chungah a ummi a si tiah US nih an cohlanmi hi US-Taluk pehtlaihnak hram taktak a si. US nih Taiwan hi a dang tein an hmuh ni cu US-Taluk pehtlaihnak a dongh ni a si a ti.
1979 in US nih Taiwan hi Taluk chung ram pakhat bantukin a cohlan cangmi a si. Taluk zong nih kan peng chungah a ummi ram pakhat a si tiin an hmuh ve. Asinain Taiwan hi amah tein aa ukmi ram a si i, democracy phung a zulmi zong an si. Trump nih cun 'communist ram ah democracy ram pakhat kan ngeihchun a si' a ti ve.
Taluk foreign ministry leiin biachimtu Lu Kang nih a chim thanmi cu Taiwan kongah hin US lei nih fak piin kan ruahpiak hna seh law US cozah kip nih an rak zulh pengmi kha Trump cozah zong nih an zulh ve awk a si. Vawleicung ah Taluk pakhat lawng a um. Taiwan hi Taluk in then awk a tha lo a ti.
Asinain Trump nih cun 'One China timi telh chih in zeizong vialte hi cabuai cungah ceih khawhmi an si ko' tiah a chim. Ref: CNN.