Trump kongah US sungthoh bu zong an thinphang i, Israel ca zong ah an thinphanpiak tuk cang hna. Israel cozah le Trump cozah information an i hrawmmi hi Russia sinah Trump cozah nih an pek hna tikah Russia nih Iran sinah an pek chin te hna lai i, Israel chunglei kong Iran nih an theih dih te lai tiah zumh a si.
US sungthoh bu upa nih Israel sungthoh hruaitu upa zong naite ah tonnak an ngeih lioah ralrinnak an pek hna tiah Yedioth Ahronoth medai nih a chim. Zeitik ah dah an i ton i, khawka ah dah an i ton timi an langhter lo. Russia le Trump pehtlaihnak hi Israel security caah tihnung a si lai tiah US sungthoh bu upa nih cun fak in ralrinnak bia an chim.
Israel sungthoh bu le US sungthoh hi thup in pehtlaihnak a ngeimi le information kip aa hrawmmi an si. US sungthoh upa nih Israel sungthoh bu ralrinnak an pek rihmi hna cu 'Trump cozah sinah information nan pek hna tikah nan i ralring lai. US National Security sinah nan pekmi zong nan i ralring lai an ti hna.
Russia le Trump Cozah pehtlaihnak hi tha tein nan zoh lai i, lunghrinh awk an um lo; kan caah ral a um lo tiah fiang tein nan hmuh hnu lawng a herh ning in pehtlaihnak le information hrawmnak nan ngei te lai tiah an chim chih. Russia le Trump karlak ah pehtlaihnak a um ahcun Russia sinah information pekmi hna kha Iran sinah Russian kut in a lan khomi a si an ti hna.
Trump nih cun 'Russia he thuk piin pehtlaihnak a ngei timi thawngpang hi a hmaan lomi a si. US sungthoh bu nih hi bantuk thawngpang hmaan lo hi lengah an chuahter ding a si lo tiah a mawhchait ngai hna. A chuah ding a si hmaanh ah an kham ding a si. A donghnak an ka kah a si' tiah Trump nih twitter in a tial ve. Ref: TOI.