California khua cungah US raltuknak vanlawng an zuang i, raltuknak vanlawng chung in seh thil fa tete a chuak i, a zuangmi a za leng an hmuh hna. Drone fa tete an si tiah US ralkap lei upa nih an chim. 'Drone' timi cu vanlawng an si i, computer in rak control mi an si.
'Drone' fa tete hna cu US ralkap nih sungthoh le thlithup ngiathlainak caah an hmanmi hna an si. US raltuknak vanlawng F/A-18 Super Hornets pathum cu California khua cungah an zuang hna i, an pathum chung in 'Drone' fa tete hna cu an rak chuak thluahmah hna i, anmah tein an zuang ve hna.
An sau hi 30cm an si i, fawi tein hmuh khawh zong an si lo. Tapung umnak le ralkap nih kah an duhnak hmun hlatnak ca le kawlnak caah an hman hna lai. Pentagon nih cun ralkap mission caah hman ding an si lai a ti. An hneksakmi vialte hi 103 an si. Hmailei kum ahcun hi bantuk raltuknak hriamnam tbk hi hman an si te lai.
'Kan ralkap nunnak thap le thlah zong hau ti loin kan drone fa tete kan thlah hna lai i, tapung an kawl hna lai, ral a do lai i, kan herhmi rian paoh kan tuanter hna lai' tiah director of the Strategic Capabilities Office leiin William Roper nih a chim.
'Tluang tein hneksaknak an tuah khawhmi cungah Strategic Capabilities Office riantuannak kan thangthat hna tiah Secretary of Defence Ash Carter nih a chim. 'Kan ral hna hmaiah a kan umtertu hriamnam an si lai i, system thanchonak langhter zong a si' tiah a chim chih. Ref: The sun.