President biakamnak a tuah ni i bia a chimmi ah cun a fiang tuk cang. Campaign a tuah lioah a chim lengmangmi cu "America First' ti a si; a vun ra thanmi cu 'Make America Great Again' ti a si. US le ramdang pehtlaihnak zong a chim lengmang, ningani ah a chimmi cu Trump lungput fiang tein a lang cang.
A biachim le lungput in an zoh lengmang tikah cheukhat nih cun 'protectionist' ti zong in an auh i, isolationist' ti zong in an auh. A humhak lungput le hawi he aa hlatmi lungput a si tiah vawleicung nih cun an ruah. Ningaini ah fiang tuk in a chimmi cu 'vawleicung ram hna he hawikawm sinak le thatnak kan kawl lai' a ti.
A peh thanmi cu 'asinain miaknak hmuh kan duh cio ruangah hawikawm le thatnak kan kawlmi a si timi thei cio bu in kan i pehtlai hna lai' a ti. A chim cuahmah lioah ruah an rak sur pah thluahmah ve. Ramri zong a chim than. 'Kan ramri zong ka kham lai i, ramdang cawlcanghnak that lonak in kan company le kan rian kan runven lai' tiah Trump nih a chim.
President Trump nih aa fian tukmi cu 'runvennak nih thanchonak le thazaang a kan pek lai' a ti. Trump nih a chim lomi cu vawleicung i hruaitu (America leadership in the world) an sinak kong hi a si. Timh ciammam tein a chim lomi a si ti a fiannak cu 'aho cung hmanh ah kan duhnak kan khin hnawh hna lai lo, asinain kan tuahsernak tu hi zohchun awk caah mei bantukin ceu seh' a ti.
Cheukhat nih an thinphanmi cu American nih vawleicung hruaitu sinak a tlaih lo ahcun Taluk or Russia nih an tlaih colh an ti. Trump nih a chim thanmi cu 'chan tampi chung American nih a man cawi in ramdang kan rumter hna' kan ralkap man liamter in ramdang ralkap kan thawnter hna' a ti. Hi vialte ruangah hin kan rumnak, kan thazaang le zumhnak an rak zor dih' a ti.
President Trump nih fiang tuk in a chim than cang. Vawleicung ram kip zong an i fiang tuk cang lai. Vawleicung ram nan sinah ka chimmi a si tiin a chim lo nain vawleicung ram, a hleiin US hawile vialte nih an fiang dih lai. Ref: CNN.