President thimmi Donald Trump nih a lettiling in vawleicung lehthal dih a timh cang. United States of America ral a simi Russia cu a hawi ah ser a timh i, caan sau pi chung an hawi a simi Germany tu khauruah tam in chiah a timh cang. US nih a kan um pi ti lai maw, um pi ti lai lo dah tiah khua an ruat cio cang hna.
EU le NATO tbk hna zong US hawi tha an si. A ram zong in US nih a herh hna i, an vawlei zoh zong in US nih a herh hna. Vawleicung ah America nih hruaitu dirhmun an tlaih lengmang nak ruang hi an hawile ruang le ram pehtlaihnak an ngeihmi hna ruangah a si. Asinain Trump nih a chim tawn bantukin a tuah ahcun US hawile vialte an tio dih lai i, an ral tu hna kha an i lawm te lai.
Trump nih Russia hi zungzal in a kawm kho hna lai lo. Caan zeimawzat chung cu an i kawm kho lai nain Russia nih zei bantuk lungput in dah a kawmh te lai timi zong theih a si lo. Russia cu US he aa ral pengmi an si caah Russia nih lehrul chamnak caan a bawh peng. Trump chan ah caan tha la in, Russia nih thil zeimawzat zong a tuah te lai.
Trump hi kum li maw a tuan lai theih a si lo. Trump a dih in cun midang nih an tuan than te lai. Russia a ralmi zong an tuah te lai. Russia nih a theih dih ve. Cucaah Trump nih US hawi vialte a suaksam dih hna i, Russia tu aa kawmh sual taktak ahcun a palh tuk te lai. US caah sung taktak a si te lai i, Russia caah miaknak taktak a si te lai.
President thimmi Trump nih vawleicung free chawlehthalnak hi a haut ngaimi a si. US caah kan sung tuk a ti. Trump nih fak deuh in hma lak a timh ahcun Taluk he aa tong colh ding an si. Taiwan kong zong ah linsatnak fak tuk in a chuahter than cang. Khatlei in Russia cungah Trump lungput hi thlen aa tim lo. Putin zong nih biatak ngai a vun dirkamh cang.
US embassy thialnak kongah a si than i, US hawi tha Arab ram vialte lung a fahter than dih hna lai. Jerusalem ah America embassy a thial ahcun Muslim ram vialte an tho lai i, US he Israel he an i ral dih than hna lai. Mexico he zong in aa su i, Canada he zong in aa su ding dirhmun ah a um. North American Free Trade Agreement (NAFTA) hi Canada, US le Mexico nih an sermi a si i, cabuai cungah kan ceih than lai tiah Trump nih a chim.
America nih aa zuam pengmi cu ram dangdang he daihnak, fehfuannak le theihthiamnak ser lengmang aa zuam, a hleiin democracy ram poah dirkamh ding in aa zuam peng fawn. Trump nih a chim ning in a zulh taktak ko hna ahcun fak tuk in hninhseihnak a ser te lai tiah an zumh cio. Ningani in cun Office a tlaih cang lai i, Vice President Mike Pence tbk le a dangdang ruahnak in maw a kal te lai, amah ruahnak in dah a kal te lai. Ref: CNN.