Asinain President Obaman nih Inn Raang a chuah tak lai ah ngaihthiam ding in nawl a chuah i, May 2017 ah an luatter than lai. US Politics fak tuk in linsatnak a ser than rih lai tiah an zumh. Obama nih a luattermi minung 209 chungah Chelsea Manning zong aa tel ve. Nihnihni ah khan minung 64 ngaihthiamnak nawl a chuah cang.
Cheukhat thongtla hna cu drug sualnak leiah an si i, cheukhat cu a dangdang kongah an si hna. Inn Raang leiin Obama ai ah biachimtu Neil Eggleston nih a chimmi cu 'kan ram cu mi a ngaithiammi ram a si. Tei a mami le pumpeknak a ngeimi hna ca zong ah a voihnihnak caan a pemi ram a si. A luan cia kan tuanbia nih kan hmailei caan tha a kan chuh ding a si lo. Hmailei ah a kal chin lengmang ding an si' a ti.
Hi lungput in hi vialte thongtla an ngaihthiamnak hna le hmailei zong an ngaihthiam hna nak ding a si. Chelsea Manning zong hi a hlanah cun Bradley Manning a si i, Wikileaks sinah thlithup ralkap lei document a pekmi hna hi 700,000 leng a si. A tam tuk ngamsam. Cu chungah Iraq, Afghanistan an tuhnak le ral an dohnak aa tel i, State Department cakuat zong aa tel.
Chelsea Manning hi Jonathan Pollard he an case aa khat ko. Pollard hi US citizen zong a si. US ralkap sungthoh riantuannak chungah rian a tuanmi a si i, Israel miphun zong a si caah thlithup in Israel sungthoh sinah thlihup information a pek lengmang ve hna. An theih i an tlaih. 1985 ah an tlaih i 2015 ah an thlah. Asinain Chelsea Manning case hi zoh tikah kum thum chung men ah thlah than ding minung a si lo.
Julian Assage nih cun ' Chelsea Manning an thlah thanmi cu kan 'teinak' a si a ti. House biachimtu Paul Ryan nih cun fak taktak i Obama khuakhan a phomh. ' Chelsea Manning lihchim le hrokhrol nih kan ram le kan minung nunnak a tihnung tukmi hmun ah a ka chiah. Obama khuakhan hi a tihnungmi a si a ti. Senator Tom Cotton nih 'leirawitu' Chelsea Manning tiah a auh ve. Chelsea Manning luatter an timh cu an thinhung ngaingai hna. Ref: VOA News.