President thimmi Donald Trump le Taiwan President Tsai Ing-wen phone chawnh hnu cun Taluk le US karlak zong ah entainak a um i, Taluk le Taiwan karlak zong ah entainak a um cang. Taluk media ngan bik Global Times hna cun Taiwan lak ding tiang in a tial cang; Trump zong dong loin an vun phomh.
Cuticun an karlak ah entainak a linhsat cuahmah lioah Taiwan nih a ralkap thazaang a vun phozar thluahmah ve. Tuaktan thiam nih an chimmi cu 'hi bantukin a ralkap thazaang a langhter i, ralkap eksaisai an ngeihmi hi Taiwan cozah nih a mipi thazaang peknak ca le kan i rungveng kho tuk ko timi langhter a duh caah a si' an ti.
Taiwan ralkap eksaisai tuahnak ah aa telmi hna cu an raltuknak vanlawng, tank le roket kahnak hna an si. Nihnih chung Taiwan in thlanglei Tainan Air Force hmun ah an tuah. Taiwanese Military News Agency leiin an chimmi cu 'hi bantukin entainak a linhsat cuahmah lioah mipi lungre a thei i, an thinphang. Cucaah mipi thazaang peknak caah kan thazaang kan langhtermi a si' an ti.
November ah khan Taluk nih a ralkap thazaang phorzarnak a tuah ve. Taiwan le Philippines ramri lei tiang eksaisai an va ngei tiah theih a si. Taiwan le Philippine caah cun a nuam lo ngai nain Taluk nih cun international phung tein kan tuahmi cawlcanghnak a si ko an ti.
Taluk media nih cun Trump cung lawng te ah mawhphurhnak an tlunter. Taluk-US pehtlaihnak hnursuannak nih 'Make America Great Again' cu a chuahter kho bal lai lo' tiah People Daily nih a tial. Taluk nih Taiwan hi a ramchung peng pakhat bantukin a hmuh lioah Taiwan nih cun Indepedence an kawl lengmang.
Trump nih Taiwan kong a chim tikah Taluk nih an duh lo tuk. 'One Chinna' timi hi na upat ding a si tiah an zai hnawh lengmang. Ref: The sun.