Zan kan ih tikah ruah lo piin zantim ah kan i thang tawn. Kan i thangh tikah hngilh than a har ngai i, kan i hrio beh tawn caah sivang in zan caan kan hmang theo lengmang. A caan hna ahcun hngilh thai kho loin khua kan deu theo.A caan ahcun ihkhun cungah kan i teng-tehle.
Asinain hngilh than khawhnak lam pahnih a um:
Pakhatnak cu 'toilet' ah kal hrimhrim lo ding. 'The Power of When' a tialtu Dr Michael Breus nih a chimmi cu 'zantim naa thangh tikah cawlcang lo tein ih peng ding a si' a ti. Na zun a chuah zong ah thawh lo a tha. Na thawh ahcun na lumnak a chuak i, na pum chung thisen a cawlcang cang i, hngilh than a har cang' a ti.
I hngilh than khawh colhnak caah cun zantim kan i thangh zong ah cawlcang lo tein um kha a tha cem. Kan lungthin kha a cawlcang lo i, a dai than colh i, hngilh colhnak zong ah a tha cem a ti.
Pahnihnak cu 'caan zoh lo ding' a ti. Zantim kan i thangh tikah caan kan zoh tawn. Asinain Dr Breus nih a tha lo a ti. Nan phone zong zoh len lo hi a tha cem. Caan na zoh tikah na mitkuh an hrioter chin lengmang a ti. Cun fawi tein hngilh than khawhnak ding ah thawchuah ning zong a rak um than. 4-7-8 thawchuah ning a um i, thiam ahcun ruahnak a daihter i, taksa zong a cawlcanghter.
Thawhchuah ning an thiam tikah pum nih thli (oxygen) a dawp i, kan chung thihri paw a cawlcanghter fawn. Citicun daihnak nih kan pum, ruahnak le lungthin a uk. Yoga ti zong in an auh i, ke-kalh in an thut i, dai tein an thut i chunglei daihnak an kawl bantuk khi a si. Ref: The sun.