US Golf tuk thiam taktak zong a si i, vawleicung minthang pakhat a simi Tiger Wood nih a miphun American cu 'hi bantukin kan ram nih buainak a ton cuahmah lioah kan lung aa rual a hau' tiah forhfialnak bia a chimh hna.
Dubai ah a um lio a si i, CNN ah a chimmi cu 'kan lung rualter hna u sih law kan ram caah a tha bikmi kan tuah awk a si' tiah tuan deuh i No. 1 Golf tuk thiam Wood nih a chim. President Trump nih Muslim khamnak nawl a chuah hnuah a chimmi a si.
'Kan lung aa rual a hau i, American kan si bantukin lungthin khat ah kan um awk a si' tiah Wood nih a chim nolh. December ah President Trump he Golf an rak tu ti bal cang. A chim thanmi cu 'atu lio ah cun then-cheunak tampi a um ka theih ko, asinain caan, lungsau le lungrualnak nih a tei than te ko lai' a ti.
President Trump nih Muslim khamnak nawl a chuah i, US Federal biaceihnak nih caan karlak an phihpiak hnuah Tiger Wood nih a vun chimmi a si. President Trump riantuannak hi lungsau in kan hngah i, kan zoh hmasa rih ding a si ko tiah Trump cozah a vun dirkamh.
Trump nawlchuahnak nih Muslim le Africa ram pasarih - Iran, Iraq, Libya, Somalia, Sudan, Syria le Yemen - cu ni 90 chung a kham hna. Cun refugee poah cu ni 120 chung a kham chung hna. Trump nih aa tinhmi cu caan karlak kan kham chungmi hna cu 'zeitin dah US an luh tikah hlathlainak kan tuah te hna lai timi kan ruah lio a si' a ti. Ref: CNN.
A Ka Duh Ko Tiah Ka Ruahmi Cu A Rak Si Naisai Lo
----------------------------------------------
---------------------------------------------------------------------