A ta Johnson nih a farnu Tania cu January 23 ah sianginn ah a va thlah. Caan zeimawzat a rauh hnuah police nih phone an rak chawnh hna i, nan farnu ti chungah a tla tiah thawng an rak thanh.
An farnu thih thawng an theih cun a rannak in sianginn ah cun an tli i, an farnu ruak cu police nih puan raang in an rak tuam cang.
Ruah lo tuk in an farnu ruak an hmuh cu an celh lo tuk i an mitthli he an khup an i bil i, an far ruak cungah cun an tap thluahmah. Police nih an chimmi cu 'amah tein ti chungah a zuang i aa that' an ti. Asinain a chungkhar nih cun 'an tlaihhremnak ah a thimi a si' an ti. A ka chungah a buan zong a um tikah thil pakhat a tuahmi le an tlaihhremnak a si ko an ti.
A chungkhar nih an chim thanmi cu 'Tania bawngbi zong an tlek len. An hnuh i an tlaihhrem lo ahcun hi bantukin a tlehnak ding a um lo. An tlaihnak le an hnuhnak ah a tlekmi a si. A fiang tuk ko' an ti. Tania a pa Madeem Gill zong nih a chimmi cu 'Tania cu mino te a si, aa lawm zungzalmi a si pinah ruahchannak a ngeimi a si. Amah tein a nunnak aa lak ding cu a si kho lomi a si' a ti.
A chim thanmi cu 'duh a nung i, kan zohthla tukmi a si. Zanlei kip ah cun Skype kong a kan ruah i, nuam tein bia kan i ruah lengmang hna. Kan fanu thihnak kong theih kho hna hlah tiah eihmur kawltu police nih a kan kham. Asinain ka fanu a thattu ka hmuh hna hlan chung poah cu ka ngol lai lo' tiah Gill nih a chim.
Asinain police nih cun sianginn a kainak aa nuam bal lo an ti. Sianghngakchia dangdang nih cun a hmaan lomi a si an ti. Police nih an chimmi cu a hmaan lomi a si an ti.
British Pakistani Christian Association ah chairman Wilson Chowdhry nih Pakistan Khrihfami vialte sinah a chimmi cu Tania thattu hi kan tlaih i, biaceihnak ah kan chuah pi hlan tiang kan i zuam lai a ti. Pakistan nawlngeitu le cozah zong nih Khrihfami a kan ralnak hi an theih awk a si cang tiah a chim. Pakistan ah Khrihfami tlaihhrem, thah le hrem hi a tam ngai. Khrihfami hna an him bal lo. Ref: TCP.
ISIS Minung 12 Nih An Tlaihremmi Nu: A Kan Tuahto Ning Chim Ngam Si Lo
--------------------------