Nilini ah UN Security Council an ngei i, President Trump nih ambassador caah a thimmi Nikki Haley zong a kai ve. A voikhatnak UN meeting a kai a si. A voikhatnak UN meeting ah Russia cu fak ngaiin a vun phomh colh hna. Russia nih Crimea an chuak tak hlan chung poah cu dan kan tatmi kan lakpiak lai lo a ti.
'Russia nih Ukraine in Crimea a lakmi hi United States nih kan cohlanpiak lo pinah Crimea hi chuah tak cang hna seh. Crimea cu Ukraine ramchung a si. Ukraine sinah Russia nih Crimea hi a pek than hlan chung poah cu Russia dan kan tatmi hi kan donghter lai lo' tiah President Trump nih UN ah a thlahmi ambassador Nikki Haley nih a chim.
Ukraine in ni chuah leiah Russia dirkamhmi raltho le Ukraine ralkap an i doh lengmang rih. Mah konghe pehtlaih in UN ah emergence tonnak an ngei. Nikki dirhmun le President Trump dirhmun aa dang taktak tiah mipi nih cun an ruah. Nilini ah CNN sinah Inn Raang chunglei kong a theimi nih an chimmi cu 'Inn Raang nih a hlankan in Nikki biachim dingmi kan theih ko' an ti.
Nikki Haley nih tuan tein a chim lengmang cangmi cu Russia cawlcangh hi ka cohlang kho lo a ti cang. Ambassador caah an thim i, fehternak an tuah lio zong ah Russia a hmuh ning fiang tein a chim. President Trump he an hmuh ning aa dang ngaingai. 'UN i ka voikhat langhnak i Russia cawlcangh tha lo vun mawhchiat colh ding cu a poi ngai tiah ka ruah, asinain Crimea hi a chuah tak a hau' a ti.
'Russia he pehtlaihnak tha ngeih kan duh ko. Asinain Ukraine in nichuak lei Russia cawlcangh zoh tikah fiang te le raltha tein mawhchiat an hau ko' tiah a chim chih. A chim thanmi cu 'ruah lo piin an i kah thanmi nih mipi harsa tuk in a umter hna. Ramchung ah mipi cawlcanghnak le riantuannak zong a dawnhkhanh tuk hna. Cucaah an buainak hi an ngol hrimhrim a hau' tiah Nikki nih a chim.
UN ah cun Ukraine embassador zong a dir i, an ralkap a thimi hmanthlak a thlir i, Russian embassador pa Yelchenko cu 'nan thahmi pa hi na hmu maw' tiah a sawh chih. UK ambassador Matthew Rycroft nih Russia a mawhchiat ve hna. Ukraine buainak hi Ukraine ruangah a si tiah Russia nih an ti lengmagmi hi a hmaan lo; Russia tu hi buainak a chuahter lengmangtu nan si a ti. Ref: CNN.
An Hnuh, An Tlaihrem I An Fanu An Thahpiak Beh Hna
-----------------------------
---------------------------------------
---------------------------------------
------------------------------------