An chungkhar pakhat nih a chimhmi cu Europe in a khua ah Mughnijeh a rak tlung i a hlan muisam a keng ti lo tiah a chimh hna. Mossad sinah a chimh hna tikah Mossad nih an ruahmi cu Europe ah a muisam aa thlen than ti kha an theih colh. Germany, Berlin ah thil sining a vun fiang.
British catial Gordon Thomas chim ning ah cun Berlin ah chiahmi Mossad agent Reuven nih German sungthoh agent a ton i German sungthoh agent nih Reuven cu Mughnijeh muisam thlennak kong a chimh.
Aaa thlennak clinic hi Nichuah German sungthoh Stasi ngeihmi a si. Tapung an siah sungthoh an siah an muisam kha an thlen hna i Nitlak German ah an thlah tawn hna. Reuven nih tangka tam nawn pek ding in hnatlaknak a tuah pi hna hnuah Mughnijeh hmanthlak cu 34 hrawgn an pek. Mossad expert nih Mughnijeh hmanthlak cu an chek dih cikcek.
A muisam aa thlennak hna cu: a tanglei khabe tawi deuh in aa tan; a khabel tawi deuh le zum deuh in aa tuah; a hmalei haa paoh kha a tuh in aa thlen dih hna; A mit vun zong an renghpiak; A sam zong zawng dang in aa thlen pinah mithman zong a dang in aa thlen. A hlan i a muisam he khan cu aa dang dih cikcek cang. Mah hnuah cun Mossad hruaitu Meir Dagan nih a thiam tiah ruahmi Kidon team (mi thah leiah a thiammi) le Mughnijeh file a dothlattu senior officer upa a auh hna i tonnak an ngei.
A caancaan te lawng ah Nitlak ram a tlawng i Iran le Syria lawngah a um deuhmi Mughnijeh thah ding cu a har ngai ding a si. Arab ram ti bantuk ah Israel ralkap nih tapung hrang an va phomh tawn hna; Tunis tiang hmanh an phan i tapung hruaitu Abu Jihad hmanh an va thah khawh. Cu tluk cun Israel sungthoh hi an thiam i, an raltha.
Asinain Iran le Syria ramchung ah va luh hnawh hna ding cun a fawi ti lo; Beirut le Tunis naak in a let in a tihnung cang zeicatiah Iran le Syria chungah cun security ah an tha tuk. Mughnijeh hi Iran le Syria ah kan thah khawh ahcun zeitluk in dah hmual a ngeih lai ti kha Meir Dagan nih cun a theih. A hleiin Mossad kut in a hohmanh luat khawh a si lo kha an theih lai a ti.
February 12, 2008 ah Iran cozah thlennak aniversary an tuahnak ah Iran le Syria official he tonnak a ngei ding an si i Imad Mughnijeh zong a ra ve lai ti kha Mossad nih an theih i Mossad headquarter ah tonnak an ngei tiah London Independent Daily nih a chim. An ceih dih hnuah biachahnak an tuahmi cu Mughnijeh motor pawngah bom hmanhmi motor kan chiah lai ti a si.
Asinain Mossad nih fiang cikcek in theih hmasa an duh: Syria ah a ra taktak lai maw? Zei bantuk motor dah aa cit te lai? Khawika ah dah a um? Aho nih dah a zulh lai? Khawika ah dah tonnak cu an ngeih lai? Syria a rat tikah a rat lai dingmi thawngpang Syrian nawlngeitu nih an thei cia maw ti bantuk kha fiang tein theih cia dih an zuam. Information an hmuhnak hi bochan awktlak a si ko timi an theih tikah Meir Dagan nih special minung pathum cu bom he Syria ah a vun thlah hna.