A ngaingai ti ah cun aho Pastor hmanh an tling lo. Asinain Pathian nih Pastor ding in a auh hna i Khrihfabu ah riantuan ding in a fial hna ahcun a si khawh chungin kan bawmh hna i thazaang kan pek hna ding a si. Bible nih 'Pathian nih chiti a thutmi cungah a hodah a kut a khing ngam i, sualnak ngei loin a luat kho' a ti (1Sam 26:9).
An rian an daihthlanh tik le palhnak maw chambaunak maw an ngeih tikah kan soisel hna lai lo tinak a si maw? Soisel hlah! Khrihfabu tam deuh ah cun Khrihfabu kong a tawlreltu hi Khrihfa upa (rulling board) an si. Paul nih Korin khuami sinah a chimmi cu 'aa tlak ning le aa dawhnak in Khrihfabu cu a um awk a si' a ti (1 Korin 14: 40).
Ngaihchia ngai a simi cu Khrihfabu chungtel nih an Pastor an soisel tuk hna. A hmaan lomi a si. Pathian mithmuh ah sual a si. Khrihfabu chungah thennak a chuahter lawng si loin Pathian bia an ngaih tikah an lungthin le ruahnak aa khar dih cang. Pathian nih rian a tuan kho ti lo. Cucaah Pastor he rem tein um hi thanchonak caah a tha bik. Pastor zong soisel awk ngei loin um hi a hmuitinh sangbik ah a chiah awk a si. Paul nih Timothy sinah a chimmi kha a herh tuk.
Khrihfabu chungah Pastor cu soisel hrimhrim hna hlah u. Nan Pastor te ca tu ah thla cam lengmang u. Nan Khrihfabu ca zong ah thlacam u law, Biakinn zohkhanhtu vialte hna ca zong ah thlacam u. Cuticun nan tuah ahcun Pathian tuurun hna caah tukhaaltu than an si ko lai. An riantuannak zong ah thathawhnak a um lai. Peter nih 'thatho tein a rian tuan u' a kan timi kha tlinter u. (1 Peter 5:2).