President Trump Muslim khamnak kongah US Justice Dapartment le Federal Biaceihtu hna cu US Appeals Court biaceithu pathum hna hmaiah phone chungin biaalnak an ngei. San Francisco i US Appeals Court nih an biaalmi zoh in biachahnak an vun tuah colh lai.
President Trump nih Muslim ram pasarih a khammi hna kongah Federal biaceihtu nih phihpiak chungnak nawl an ngei maw ngei lo timi tha tein an zoh lai. Phundang in chim ahcun zei bantuk hrimhhram charhchan in dah President nawlchuahmi an phih timi a cuai an thlai lai. US phunghram le upadi ning in biatung a dirh kho paoh nih teinak an hmuh lai.
U.S. attorney August Flentje nih a chimmi cu 'President Trump nawlchuahmi hi a nawlngeihnak chungin a chuahmi a si i, Congress le phunghram nih nawl an pekmi a si. US a lut dingmi hna caah hlathlainak tuah kho ding tiang in nawlchuahnak a ngei ko' a ti. A chim thanmi cu Congress le Obama cozah lio zong ah Somalia, Sudan, Iran, Iraq, Libya, Syria le Yemen hi tapung cawlcanghnak ram an si tikah a biapi ah an ruah cangmi hna an si' a ti.
US ah Somlis an tlaihmi hna hi Al-Shabab tapung he aa pehtlaimi lawng te an si tiah a chim chih. President Trump nih a khammi hna hi a si awk a si ko a ti. Federal biaceihtu nih Trump nawlchuahmi an phihmi hi cu karhlei an lamh tuk bia a si ko a ti.
Federal biaceihtu leiin Washington state Solicitor General Noah Purcell nih US Appeals Court ah a chim vemi cu 'biaceihtu lei nih tha tein zoh thannak an tuah hlanah Trump nih khamnak a tuahmi nih hin kan ram a buaiter dih a ti. 'Trump nih a khammi hna hi Muslim thleidan ruangah a si maw tiah Purcell cu bia an vun hal. A lehmi hna cu 'President Trump nih khamnak nawl a chuahmi hi Muslim harnak peknak deuh caah chuahmi a si a ti. Campagin lioah pei Muslim mipem kan kham dih hna lai a ti ko kha' tiah a chim.
President Trump nih nihnihni ah a chimmi cu 'kan ram runvennak kong biaceihnak zung i kan i dohmi cu a zumh hmanh ka zum kho lo' a ti. Homeland Security Secretary John Kelly zong nih Trump a vun dirkamh. 'Federal biaceihnak nih Trump Muslim khamnak an phihpiakmi hi ka upat ko hna, asinain kan security kongah kau deuh in kan zoh i, kan hmuh a hau' tiah Congress ah a chim. Ref: VOA News.
Thil Pakhatkhat A Tlun Ahcun Biaceihtu Ruangah A Si Lai: Trump
-----------------------------------------