Biahaltu: Ka theihmi chungah cheukhat cu an ngunsi i, an i uah tuk nain an hlawhtling, tangka an hmu i , an rum tuk hna. Asinain cheukhat cu an sifak i, harsa ngaiin an um hna. Zeiruangah dah a si? Pathian nih cu bantuk minung cu thluachuahnak a pek hna i, mi tha kan timi hna thluachuahnak a pe ve hna lo?
Rev: Billy Graham: nangmah lawng nih hihi a ka halmi na si lo. A donghnak a ka halmi zong na si fawn lai lo. Thluachuah pek awk aa tlak lo timi zong Pathian nih thluachuah a pekmi hna an tawn. Mi thalo timi zong an rak rum chin lengmang i, mi tha timi tu kha an rak tla tawn. Pathian nih zeiruangah dah hi bantuk thil cu a tuah hnga tiah biahalnak dong loin a um lengmang.
Prophet Habakkuk zong Pathian sinah a rak zai ve ko. 'Zeiruangah dah mi thalo hna riantuannak na zoh sawhsawh ko hna? Zeicahdah a ṭha lomi hna nih anmah naakin a ding deuhmi kha an thah len ko hna tikah hin dai tein na um ziar ko?" tiah Pathian cu bia a rak hal (Habakkuk 1:3, 13).
Asaf nih aa thawh ve i, "zeicahtiah mi ṭhalo hna an huncho kha ka hmuh i an i porhlawt kha ka theih tikah cu nih cun ka nah a ka chuahter. Annih cu fahnak zeihmanh an ing lo, an ngan a dam i an ṭhawng. Midang bantukin harnak zeihmanh an tong lo, midang bantukin temhinnak zeihmanh an hmu lo' tiah misualmi he a rak i tahchun sual ve (Sam 73).
Asinain zeiruangah dah mi tha nih harnak le sifahnak kan ton lioah a sual i, a thalo taktak timi nih hlawhtlinnak le rumnak an hmuh khawh lengmang timi hi Bible nih a kan chim lo. Vanram lawng ah fiang tein kan theih te lai. Bible nih thil pathum a kan chimhmi cu:
1) Rumnak hi Pathian thlauchuah kan hmuhnak hmelchunhnak a si lo. Cheukhat cu an rum tuk nain an nunnak ah lungretheihnak le nuamh lonak in a khatmi an tampi. An rumnak nih Pathian zong an thangthat lo. Pathian caah santlaihnak a ngei lomi rumnak zong an ram tuk. Cheukhat cu lih le hrokhrol in rumnak a hmumi an um fawn.
2) Kan nunnak ah thluachuahnak sangbik le nganbik kan hmuhmi cu Jesuh Khrih kan theihmi le ni fatin in a duh ning tein kan nun lengmangmi hi a si. Chawva in kan ti ahcun kan sifak tuk ko lai, asinain Jesuh Khrih kan theih ahcun rumnak vialte naak in kan rum deuh. 'Dinfelnak kha tihaal in a haalmi cu thluachuakmi an si, zeicatah pek an si lai' tiah Jesuh Khrih a ti (Matt 5:6).
3) A donghnak ni le caan ahcun Pathian hmaiah kan dir cio te hna lai. Cu ni ah cun kan riantuanmi kong a kan hal ti lai lo; kan bank account chungah tangka zeidah a um timi a kan hal ti lai lo. Bia pakhat lawng a kan hal cang lai: Jesuh Khrih hi na khamhtu le na Bawipa caah na zum maw ti lawng a kan hal cang lai. Cucaah midang kha hnger hna hlah u. Jesuh Khrih i na umnak kha fiang tein lang seh law Jesuh Khrih na ngeihmi ah khan i lungsak ko.
Saram Cungah Kan That Lo Tukmi Hi Zeitin Dah Na Rauh? Billy Graham Bialehnak
----------------------------
-------------------------------
-------------------------------
----------------------------------