Kalsual phungki Wirathu hi a biachim a chia zungzalmi a si. January 2015 ah UN riantuantu Yanghee Lee cu 'hlawhhlang nu' tiah a rak auh. Ni kum October ah biahalnak an rak tuah than i, 'Muslim hi kan ram thurhnawmhtertu an si' tiah Rohingya Muslim pawl a rak ti than hna.
President Thein Sein chan ah khan cun zalong ngaiin bia a chim lengmang. Kawl miphun a sinak a langhter lengmang. A biachim a chia i, miphun dang a huatnak a langhter lengmang. Asinain NLD cozah an kai hnu cun thil sining a vun i thleng ngaingai.
A hleiin NLD cozah ruahnak petu Ko Ni an thah hnuah Wirathu nih a facebook ah Ko Ni thattu cungah a lunglawmhnak a langhter. A chim thanmi cu Muslim pa vatnak chacun uico vat hmanh a tha deuh tiah nu pawl forhfialnak bia a chim than.
Mah hnu cun NLD cozah nih phungchim kho ti lo ding in kum khat chung an bar cang. Wirathu nih a chimmi cu 'cozah nih an ka khammi hi a phung a si lo. Ka sia a rem lo ngai' tiah Irrawady news ah a chim.
Yangon i Tagaung Institute of Political Studies ah Soe Myint Aung nih a chimmi cu 'phungki nih phung an chim tikah politics si loin biaknak, luatnak, theihhngalhnak hmuhnak le zeitin dah kan nun ning a si lai timi kong an chim' a ti.
A chim thanmi cu 'asinain Wirathu le phungki cheukhat cu Buddism runvennak kong lawng te an chim. A kaa an phih hmanh ah a cawnpiaknak cu an daihter kho hlei lai lo. Atu cun zultu le upattu tam tuk a ngei cang ' tiah a chim. Ref: VOA News.