Catial a har tluk tein maw carel hi a har ko hnga timi ruah a phu cang. Tutan David Beckham kong kan tialmi nih tampi bia a chim. Mipi leiin comment tialmi zoh tikah Beckham kong kan tial ning tein comment a pemi an tlawm te.
Catialtu leiin David Beckham kong fiang tein an tial ko. A hmanthlak kan tarmi cu video aa zeihnak hmai tuh aa benhmi le a hmaanthlak thami pakhat he fonhmi kan tar. Video aa zeih liomi zong Siangpahrang Arthur kong a si tiah fiang tein kan tial.
Cun aho ai ah dah aa zeih timi zong kan tial i, careltu caah a fiang lo ding pakhat hmanh a um lo. Asinain comment pekmi pawl rel hna tikah tha tein carel loin ruahnak in comment a pemi an tam ngaingai. Comment pekmi cu pumpak min thlir in kan tar lai lo. Mah tein cio in zoh than te ko hna seh.
Tahchunnak ah 'Vanram Hluan' timi hla i 'nang lo cun vanram hmanh a chambau ko hnga' timi kong kan tial i, tampi nih hmuh ning phunphun in an rak comment cio. Dawh deuh in comment a pemi le dawh lo deuh comment an um hna. Pek phu a si ko tiah kan ruat.
Zeicatiah hmuh ning pek awk a thami catial a si. Tahchunnak dawhdawh he fianternak in comment tampi a rak ra. An tha ngai hna. A hmaanmi le a thami soisel hi media lei zong nih kan herh tukmi a si. Media nih a hmaan loin thawngpang kan tial sual ahcun mipi hlen bak a si cang. Phomh colh ding kan si ve.
Chan ciam lo Siangpahrang Arthur kong an i zeih cuahmah lio a si.
Asinain David Beck kong kan tialmi ah fak ngaiin soiselnak comment pek ding a um lo. A fiang tuk ko. A hmaanthlak le a chung catial hmuh cangka in video aa zeihnak kong a si ti a fiang colh ko. Hmai tuh aa benhmi a si ti zong a fiang colh ko. Siangpahrang Arthur kong an i zeih timi zong a fiang colh ko.
Asinain comment pekmi rel tikah catialtu palh le news hmaan loin a tialmi kan lo ngai. Cucaah tha tein carel thiam hi a rak biapi ngai timi a lang. RELCHIH