U.S. Vice President Mike Pence nih American Israel Public Affairs Committee (AIPAC) ah Iran a vun phomh cang hna. Israel hrawh ding in aa zuam lengmangmi hi kan duh hrimhrim lai lo. Trump cozah nih 'Iran hi kan zoh cang' tiah zarhpini zan ah a chim.
Israel kan dirkamhmi hna hi ceih ding zong a um lo. A zor thiammi zong a si lo; a zor kho ding zong a si lo. Israel himnak caah 100% in aa pumpemi ram kan si tiah a chim chih. A chim thanmi cu Israel le Palestinian daihnak caah President Trump zong aa zuam cuahmah lio a si a ti.
A nolh thanmi cu 'Jerusalem ah US embassy thial ding in Trump nih a ruah cuahmah lio a si' a ti. Asinain cheukhat nih cun US embassy thial hi an duh lo. Israel le pawngkam ram hna caah buainak a ser tuk lai an ti.
Jerusalem in nichuah lei kam paoh hi Palestinian nih cun kan khualipi (State Capital) a si te lai tiah chunmang an manh peng ve. Mah caah embassy an thial ahcun Palestinian hrimhrim an thinhung ko lai an ti.
American Israel Public Affairs Committee (AIPAC) ah President Trump zong bia a rak chim cang. Jerusalem ah kan embassy kan tial lai tiah fak ngaiin a rak chim. AIPAC hi Israel committe lian taktak a si i, a thawng taktakmi bu zong an si. Israel ambassador Ron Dermer zong nih 'Israel-America' pehtlaihnak a thawng chin lengmang cang lai' a ti.
AIPAC conference chung vialte cu lengah Israel dohtu pawk sandah an rak piah ve hna. Arab ram deuh lawng te an si. Banner pakhat an i tlaihmi ah an tialmi cu 'Palestinian an luat hlan chung cu Jews miphun zong an luat lai lo. AIPAC hi doh u. Israel nih West bank ah inn an sakmi zong doh u' an ti. Ref: VOA News.