Russian President Putin sinah Israel Prime Minister Netanyahu nih Iran cungah a lungput a chimmi kongah Iran foreign minister Javad Zarif nih fak ngaiin a vun leh. Hlanchan Persia bantukin chanthar Iran zong hi Israel hrawh ding in aa tim pengmi a si a kan timi hi tuanbia he aa ralkah a ti.
Voi thum tiang Israel a khamh cangmi ram ralchanh in lihchim cu tuanbia zeirel lo zong a si. Iran nih Jews miphun hi voithum tiang kan khamh cangmi a si. Asinain Benjamin Netanyahu nih nihin kan tuanbia a merh lawng si loin a luan cia kan tuanbia zong a merh. Jews miphun Torah (Bible) zong a ningcang loin a merh a ti.
A chim thanmi cu 'Esther cauk nih zeitin dah siangpahrang Xerxes I nih Jews miphun Haman kut in a khamh hna timi a kan chimh. Xerxes nih a khamhnak hna nihin tiang an conglawmhmi cu Purim hi a si. Siangpahrang Xerxes tu kha a khamhtu hna ah ruah loin siangpahrang nu Esther tu kha a khamhtu hna ah an ruah. A khamhtu taktak hna cu Persian kan si a ti.
Cun Babylon in a khamhtu hna cu Siangpahrang Cyrus a si. Ralpi Pahnihnak lio zong ah Jews miphun harsa ngai le khuacimui in nan rak um lioah an bawmtu hna le an rak cohlangtu hna kha Iran kan si a ti. Iran Parliament biachimtu Ali Larijani zong nih Netanyahu cu nan Torah (Bible) le tuanbia na thei lo maw tiah fak ngaiin a vun ti ve.
Russia in a kir hnuah PM Netanyahu cu Purim a conglawmmi Synagogue ah a leng i hngakchia hna sinah hlanchan Persia le chanthar Iran nih Israel hrawh an timh zungzalnak tuanbia a chimh hna. Putin he an i ton lioah Iran/Persia nih Jews miphun hrawh an kan timhnak peng nain an hlawhtling lo a ti. Putin tu nih cun hlanchan tuanbia ah um ti hlah; chanthar ah kan um cang a ti. Ref: TOI.