Chunglei kong a theimi le tuaktan kho nih cun ISIS hruaitu Abu bakr al-Baghdadi hi zam lawng a rian ko cang an ti. A ralkap sin zong ah um ti loin hmun kip le khua kip ah zam le thuh lawng te rianh dawh a si cang zeicatiah a ralkap he an i pehtlaihnak thawngpang a dai tuk cang an ti.
ISIS caah ruahchannak a um ti lo. A tuanh le a tlai lawng a si cang. Sungh ding in khaukhih an si cang i, tuan deuh ah Abu bakr al-Baghdadi nih a ralkap hna cu kan sung cang. Zam cio ko cang u or nanmah cio in i that ko cang u tiah video in bia a chimh hna. Amah zong a thawngpang a dai cang.
Abu bakr al-Baghdadi hi Iraq chuak a si i, a ram le a miphun sining a thei dihmi a si. US le Iraq lei sungthoh upa nih an chimmi cu ''Iraq cu a khua a si, mipi lungthin, sining le hmun le ram vialte a theih hna. Cucaah atu hi a ralkap sinah um ti loin a tanhtu khuate kip ah vak cang seh law theih lo a si an ti cang.
Sungthoh lei upa nih an chim thanmi cu 'Abu bakr al-Baghdadi le a ralkap karlak pehtlaihnak le chawnbiaknak a um ti lo. Mosul a vun sungh chin lengmang hnu cun an thawngpang a dai cang. Mosul khua a chuah tak cang caah a si ko' an ti. Iraq thise ram Sunni miphun umnak Euphrates hrawngah hin aa thup khomi a si an ti.
Raltuknak vanlawng lei tuanvo ngeitu General Mathews Isler nih a chimmi cu 'ramdang in ISIS a rak lutmi nih Mosul an chuah tak thluahmah cang. ISIS caah ruahchannak a um ti lo. Kan lentecelhnak puai a dih cang' a ti. ISIS nih kan state an timi Tigris in nitlak lei vialte zong an chuh dih cang hna. Ref: The Express.