ISIS nih Iraq ah tihnung thil an tuahmi le sualnak an tuahmi vialte hlathlainak tuah dih u law an sualnak in luatter hrimhrim hna hlah u tiah UN cu Amal Clooney nih a nawl hna. Dai tein um ti hlah u. ISIS nih vawleicung ah sualnak an tuahmi vialte hna hi langhter dih hna u tiah human rights sihni Amal nih a chim.
ISIS nih Yazidi miphun hloh ding in an au pi, an thah han, an tlaihhrem hna, Islamic biaknak ah an thlen hna i, Khrihfami zong an thah hna i an doh hna. UN nan ser chan cu hi bantuk thahnawnnak le sualnak cu um hlah seh tiah kham ding le ruahchannak in pei sermi a si cu. Cucaah cawlcangh loin um ti hlah u, Au chin lengmang u tiah UN meeting ah a forhfial hna.
Ni kum ah UN nih a report mi cu ISIS nih international phung buar in Yazidi miphun hlohnak le thahnak thil an tuah, asinain ahohmanh International Court ah biaceih an tong lo. ISIS nih nu le hngakchia 3,200 leng an tlaih hna i an sal ah an hman hna. Pa hngakchia le pa tam tuk an tlau rih. Cucaah ISIS nih mipi an phumnak thlaan vialte hna hi kan tehte caah kan i chiah dih hna lai.
UK hi thangthat awktlak an si. ISIS lainawnnak an hlathlai cuahmah lio a si. Iraq Prime Mininister Haider Al Abadi zong nih zalong tein a onh hna ding a si i, UN zong nih kan dirpi hna ding an si. ISIS thil thalo tuahmi kongah tlawm tuk riantuan i tim hlah u sih. An sual buin luatter fawn hna hlah u sih. International Court ah kan chuah pi dih hna lai' tiah fak ngaiin a forhfial hna. Ref: The Express.