Democractic leiin an bochan ngaimi Bernie Sanders nih President Trump cu ngaan loin fak taktak in a vun phomh. A lihchim in kan ram hi minung pakhat uknak phung in kal pi a kan timh cang. 'Lihchim zawtnak nih a tlunh cang. A zungzal in lih a chim. A chim sualmi an si lai ka zum lo. Timh ciammam tein a chimmi hna an si ko' a ti.
Trumpp nih media, kan biaceihnak zung, le American kan nunnak ah a biapi tukmi tungtlang dangdang a ralchanh lengmangmi hi kan democracy a doh a si. American kan tungtlang pi a simi democracy thluk duh ah lih a chim zungzal. Lih a chim lengmangmi hi a sawhsawh an si lai lo; timh ciammam tein a chimmi an si ko lai tiah a chim.
Vawleicung offiice sangbik ah businessman zong a si i TV star zong a simi sawhsawh Trump a kai ni 50 hnuah Sander nih fak ngaiin a vun phomh. Ni 50 chungah President Obama healthcare a doh, Muslim ram a doh hna, refugee a doh hna, ningcang lo mipem a doh hna, ramdang he chawlehthalnak tinak a doh etc. Lihchim in kan biaceihnak zung zong a doh, media zong a doh hna, kan electoral thimnak zong a doh i, kan institution pawl zong a doh hna.
Hi vialte aa timhmi hi American kan rawk tuk cang timi langhter a duhnak a si i, mipi lungthin thurter hna i, keimah lawng hi America khamhtu ka si tiah ka ruat hna seh ti a duh caah a si. Keimah lawng hi American mipi caah a dirmi ka si, keimah lawng hi American mipi caah biatak a chimmi ka si, America ah keimah lawng hi nawlngeitu ka si timi langhter a duhmi Donald Trump a si a ti.
Kan biaceihtu zong 'zumh tlak an si lo' a ti hna, Obama zong tehte zeihmanh ngei loin thlthup biangeihnak ka phone ah na chiah a ti, thim lio zong ah ningcang loin 5 million vote a tla a ti. Hi vialte lihchim hi tinhmi a um ko lai. President thing George W. Bush kha conservative bak te a si i, ni fatin in ka dohmi a si. Asinain American kan sunhsakmi ralchanh in rian zeihmanh a tuan bal lo a ti.
Trump tinhmi cu 'minung pakhat uknak (authoritarianism) uknak in kal pi a kan timh cang caah a si. Kan tei khawhnak lam pakhat a ummi cu mipi thazaang in doh a hau cang. Atu hi kan hmuh cuahmah cang. Cun Russia nih zeitluk in dah Trump an thluk khawh cang timi kan theih a hau. Australia he aa rem ti lo; Mexico he aa rem ti lo.
Caan saupi kan hawi a si cangmi hna he zong aa rem ti lo, asinain minung pakhat uknak aa tlaihmi Mr Putin caah cun a tha kho tuk cang tiah The Guardian nih bia an halnak ah president zong aa cuh balmi Bernie Sanders nih a chim. Ref: The Guardian.