April 22, 2004 ah North Korea in chaklei ah a ummi Nampo khua tilawng hmun leiah a kal cuahmahmi North Korea thilphur tlanglawng cu ruah lo piin fak taktak in a puak. A puahnak hmul thazaang an tah tikah 3.6 hual (magnitude) in a thawng i, a fa deuhmi lihninh he aa tluk tiah document an tuahmi nih a chim.[31]
Minung 160 hrawng an thi i, 1,300 hrawng hliamhma an ing. Inn 1,850 hrawng a hrawh. British sungthoh kongah catialtu Gordon Thomas nih cun North Korea ah nuclear thilri lak ding in a rami Syrian scientist zong zeimawzat cu a thi a ti. A puahnak hmun cu North Koran ralkap nih an kham colh i, sivai thianhhlimnak thilthuam he tlanglawng puahnak hmun cu an thianh i, si in an kah dih. Israel sungthoh Mossad nih an lunghrinh hna pinah Pyongyang i, Syrian scientist an chuah- an luh i, North Korea official upa hna he tonnak an ngeihmi zong tam pi an hmuh hna.[32]
North Korea cozah chim ning ah cun liquefied petroleum a phurmi tlanglawng a si an ti. A rauh hlanah a cozah nih media a kham colh hna i, ram chungah cell phone hman lo ding in kum nga chung a khap rih hna. Nuclear ram a simi North Korea ah zeidah a cang? Meng 5,000 tluk in a rak hlami Israel nih zeiko dah a si hnga tiah a hlat colh. Meir Dagon nih Mossad bu a hruai lio a si i, Dagon hi sungthoh minthang ngai a si pinah Israel himnak le thatnak kong ti poah ah cun a huasen taktakmi a si tiah The Guardian journalist Ian Black nih cun a ti.
North Korea cawlcangh hi Israel nih an theih lengmangmi a si. Dagon nih a chimmi cu Syria in bawmhnak a rak phurmi vanlawng cu North Korea ah a tum. North Korea le Syria pehtlaihnak hi a sawhsawh a si lo. Israel nih a zoh lengmang hna tikah a biapi tuk ah an ruah. Syria vanlawng nih bawmhnak hna hlah maw a rak phurh hna tiah mi thi ruak a rak phurhmi tu hna a lo deuh. Mi thi ruak cu chemical hriamnam sernak thilthuam aa hrukmi minung nih an thir hna i, Nuclear Research Center ah an chiah hna.
Khuaruahhar ngai a si. Dagon cu an chimh tikah an phurhmi hna kha North Korean mi thi ruak si hna loin Syrian scientist minung hleihnih an rak si. North Korean nih Syria hi nuclear ser a rak bawmh. Mossad nih an theih chin lengmang tikah biatak tein dawi an timh cang hna. Kum hnih hnu 2006 ah The Daily Telegraph nih hitihin a report, December 2006 ah Syrian official upa pakhat cu a min hleng in London ah a rak phan. Mossad nih a tlunnak hotel an theih i, a thli in an minung pahra an thlah colh hna.
Phu thum ah an i then i, phu khat cu Heathrow Airport ah an thlah hna i, a phanh cangka in ahodah a si ti kha theih ding; a phu hnihnak cu a tlunnak ding hotel ah an thlah hna; a phu thumnak cu a cawlcangh le a hawileng pawl hna kha ahodah an si tiah hlat ding ti a si. Cheukhat cu Kidon Division chung in an si i, thlithup in mi thah a thiam taktakmi an si. Cheukhat cu Negev Division chung in an si i, inn, embassy le hotel innkhan ti bantuk kutkhar tawh on an thiam taktak pinah a thlithup biangaihnak device chiah a thiam taktakmi zong an si hna.
Syrian nuclear official/scientist pa cu London a vun phak a ni khatnak ah Syrian embassy a leng hna; cu hnuah dawr ah a leng. Kidon Division nih a hnu in an zulh lengmang lioah Negev Division nih a hotel kutkhar cu an rak on i, a cabuai cungah an laptop an hmuh.
================ Peh Than Ding ==============