Israeli journalist Ronen Bergman nih cun, ‘London ah amah lawng a ra i, hotel ah a tlung. A thaizing zingka ah meeting a ngei ding a si i, a zanlei le a zan cu hotel ah caan a ngei. Hotel bar ah a leng i, amah lawng zu a rak ding. Nu pakhat a rak ra ve i, aa nuam kho tuk’[33] tiah a ti. Ka hnu in a ka zultu an um ti kha Syrian official nih pakhat hmanh a rak thei lo.
Ngaknu he cun nuam ngai in bia an i ruah i, a za ti thei ti loin zu cu a cah leklek. Tu zan cu nuam ngai caan hman pitu ka ngei cang lai hih tiah nuam ngai in a um cang.
A rak theih lomi cu a ruah ning bantuk si loin Mossad minung a rak si diam. A hawile nih a hotel tlunnak inn chung an luh chung vialte hotel bar ah cun dong loin bia a rak ruahmi tu kha a si. Negev Division bu cu Syrian official riahnak khan ah cun an kal i, a kutkhar cu an onpiak. A chung an luh ah cun a laptop cu daithlang ngai in a rak chiah ko. A rannak in a computer cu an onpiak i, a chung thilri vialte cu an i copy dih. An copy dih hnu zong ah a computer chungah softwar an chiahpiak rih; a hnuah information thar dangdang a chiah than tikah theih khawhnak ding caah khan a si.
A computer chung thilri/information an lak dih cun an chuak i, ngaknu zong nih cun Syrian official pa cu a kal tak colh ve. Mossad minung nih London ah khan Syrian official cu thah ding in timhnak an ngei nain a computer chung information an lak khawh caah an that than lo.[34] Israel Mossad Headquarter ah an tlun pi i, an zoh. An zoh tikah North Korea le Syria nih zeidah an tuah timi an hmuh i, an theih dih. North Korea nih a nuclear reactor inn a sakmi he aa khat bak te kha Syria ah an rak sak ve. An i dannak a um lo. Mossad hruaitu Meir Dagon nih cun Syria nih a tuahmi a theih cang. Syria nih nuclear inn a sakmi cu Israel himnak caah a tihnung tuk. A rannak in an hloh colh a hau. North Korean scientist Chon Chibu le Syrian scientist Ibrahim Thman hmanthlak zong a rak i tel.
Syria nih aa tinhmi cu nuclear bom ser kha a si. Israel hleikaa hram ah nuclear bom ser timh bantuk a si. Syria nih nuclear bom ngeih ding cu Israel caah a ruah-ruah ngam dingmi thil a si lo. Syria nih nuclear a ser cuahmah cang tiah Dagon nih cun aa fiang cang. Asinain kawika ah dah an sernak a si kha an thei rih lo. Dagon nih Israel satellite cu a kawlter hna. A donghnak ah Syria in a vaa hlat ngainak Al-Kabar timi thise hmun ah an hmuh. Syria thise hmun Al-Kabar in North Korea, Pyongyang karlak phone an i chonhnak an theih. Iraq he an i ramritnak hrawngah a ummi Euphrate tiva hrawngah a si. Syria khuapi Damascus he cun aa hlat ngai.
Syrian official laptop in an lakmi hmanthlak le satellite nih a hmuhmi hmanthlak cu aa khat bak te a si. Mossad hruaitu Meir Dagon cu a information he Israel Prime Minister Ehud Olmert ton ding in a kal. Olmert nih Syrian nuclear hmun hmanthlak a hmuh tikah zeitluk tihnung ah dah Israel kan um cang timi a theih colh. Syria nih nuclear bom ngeih ding cu Israel caah a si kho lomi thil a si. Olmert nih bia tampi halnak a tuah. Syria nuclear reactor hi a nung cang maw ti bantuk hna kha tha tein hlat than rih a hau. Syria nuclear sernak ah hin Iran zong dollar billion pakhat he aa tel tiah an theih, a ruang cu Iran nih a sermi hi a tlamtlin lo ahcun Syria sermi hi rinh te ding in ruahchannak a ngeih.[35]
Cuticun an nuclear reactor kha a nun cang ahcun Israel nih an kahpiak hna tikah a puak lai i, Syrian ca lawng si loin pawngkam ah a ummi Israel ca tiang in sivai tha lo a chuahter ding kha a si. Asinain nuclear reactor kha a nun rih lo cun an kahpiak hna zong ah zeihmanh minung caah tihnun ding a chuah pi lai lo. A biapi tukmi rian an ngei rih lo. Syria nuclear reactor cu a nung cang maw nung rih lo dah timi kha hlat than rih a hau. An nuclear hmun ah nun thap in kal than an hau. August 2007 ah Israeli commando ralkap an thlah hna. Sayeret Matkal ti zong in auh an si i, ‘The Unit’ ti zong in auh an si.
Sayeret Matkal hi Israel zaaraan ralkap naak in a thiam deuhmi an si i, a biapi taktakmi ah hmanmi commando ralkap an si. Zaaraan ralkap nih an tuah khawh lo dingmi ah hmanmi an si. Vawleicung ralkap thiam bik ah ruahmi zong an si. Tha taktak in training pekmi zong an si. Ral ram ah a thlithup in an thlah hna i, ral ram si ning le umtu ning a hlat lengmang tu zong an si. Jordan zong ah an thlah hna; Lebanon zong ah an thlah tawnmi hna an si i, an rak thei kho hna lo, cuticun an thlah chanmi mission hlawhtling ngai in a chuah pi lengmang tu an si.
Syrian nuclear hmun ah cun an thlah hna. An nuclear reactor a nung cang maw tiah information hlat ding in an kal. Thawng a thang lomi helicopter pahnih in commando hleihnih cu an kal i, niam tein an zuang. Cuticun Syria ram chungah cun an lut. Syria nuclear hmun in meng khat hrawng aa hlatnak ah an tum i, ke in an kal. Ralring tein an kal a hau. Syrian nih an rak theih hna ahcun an nunnak caah tihnung ngai a si lai. Helicopter nih a kir tak hna tikah rak khamh than awk ah a har ngai ding a si. Cun Israel commando nih palhnak an tuah sual i, Syrian nih an theih hna ahcun ram hnih karlak ah ral zong a chuak khomi a si. Cu tluk cun a tihnung tukmi chungah Syrian nuclear information lak awk ah Israel nih a ralkap a thlah hna.
Al-Kabar nuclear inn pawng ah cun an rak phan i, a rannak in nuclear inn pawng vawlei le tilu hang a luangmi cu dur fa tete an lak. An rak rat hnawh chan cu an tuah khawh. Nuclear inn pawng i vawlei le tilu hang an lakmi lawng khan Israel nih Syria nuclear reactor hi a nun cang maw nung cang lo ti kha an theih khawh ding a si. Syria nuclear reactor hi a nun cang a si ahcun tilu hang an lakmi ah khan radioactive sivai aa tel lai. Commando hna nih an nehnang vialte cu an thuh dih hnuah an rak kir than. Israel ah cun vawlei le tilu hang an lakmi cu an rak rat pi. Israel cozah labartory ah nuclear aa tel maw tel lo tiah an hneksak tikah nuclear cu aa tel pah ko nain nuclear reactor kha tling tein a nung rih lo timi kha an theih. Israel caah thawngpang tha ngai a si. Tihnung taktakmi rian an ngei cang ....
====================== Peh Than Ding ================