President Obama chan lioah Vice President a tuanmi Joe Biden nih President cuh a rak i timh i aa let thanmi kongah aa ngaichihnak a chim. New York i Colgate University ah a chimmi cu 'rak i cuh ning law ka rak tei ko hnga' a ti.
Presiddent cuh ding in aa tim ko nain 2015 ah a fapa thluak cancer in a rak thi i, a rak i let than. Trump nih Clinton a vun tei hnu cun a lungthin fak piin aa thleng than. Bia an halnak ahcun President rak i cuh ning law Trump hi ka rak tei ko hnga a ti.
A fapa Beau hi thluak cancer a ngeimi a si i, kum 46 a si in ruah lo piin a rak thi. Mah tiang hmah ahcun President cuh aa timhnak let a tim lo, asinain thla nga hrawng a luan hnu in aa tim kho than ding ka si lo tiah thawngthanhnak a tuah than.
'Kan lungfah le kan tuar buin in office ah rian ka tuah kho lai lo' a ti hna. 'Atu ah hin naa cuh than lomi kongah naa ngaichih maw? tiah an hal i, a lehmi hna cu 'President kaa cuh lomi cu kaa ngaichih ngaingai than ko' tiah a leh hna.
2020 ah naa zuam than ti lai maw tiah an hal i, 'kaa zuam cang lai' a ti hna. Naa biatak ko maw tiah an hal chih i, a lehmi hna cu 'zuam loin um ding in kaa tim ti lo' tiah a leh hna. A chim thanmi cu 'zei kong hmanh hi chim khawh a si ti lo. Ruah loin thil can a hmang i zeihmanh ah sehchihmi ka ngei ti lo' tiah a leh hna. Ref: The Express.