Thinhung ngaiin 'mihrut' tiah a auh hnuah Argentina bawlung chuih thiam Lionel Messi cu ngaihthiam a hal than. Messi cu zahan thla ah khan Egypt ah a tlawng i, hlan chan minthang Egypt siangpahrang hna thlaan le rolungphun (pyramids) tbk ah an leng hna.
Egyptian archaelogist min thang Zahi Hawass nih an minthang Egypt siangpahrang hna thlaan le rolungphun vialte hna zoh a zoh pi i, Messi nih khuaruahhar ngaiin zoh hna i, thangthat len hna ding khi an si. Asinain Messi nih duhsaknak zeihmanh a ngei hna lo. Zahi caah cun khuaruahhar thlaan le rolungphun lawng te an si.
Asinain Messi nih zeihmanh uarnak le duhsaknak a langhter lo tikah Zahi cu a thin a rak hung tuk. Egyptian TV nih biahalnak an tuahnak ah Messi kong cu an hal i, 'Mihrut Messi' tiah a auh. 'Hlan chan rolungphun kong ka chimh hna i, a hmaiah zeihmanh uarnak le duhsahnak zeihmanh a lang lo. A uar ngai lai ka ti i, ka chimh len nain zeihmanh a hmaiah a cuang lo. Mihrut he an i lo' a ti.
Nizan nihnihni ah Egyptian archaelogist Zahi nih ngaihthiam a vun hal than. Holhlettu chambau a si. Holhlettu nih kan biachimmi a kan pehtonhpiak khawh lo caah kan biachimmi kan i theihthiam lonak a si. Messi le a Messi uartu (fans) vialte ngaihthiam kan hal hna' tiah ngaihthiam halnak bia a chim than. Ref: TOI.