Naite ah President Trump nih Obama cu November thim lai ah ka phone chungah thlthup biangeihnak (wiretape) na chiah tiah sual a puh. A twitter ah a tialmi cu 'teinak ka hmuh hlanah Obama nih ka Inn phone ah biangeihnak a chiahmi kan hmuh' a ti.
'Hi tluk in a sunglawimi kan ram thimnak kan ngeih lioah Obama nih ka phone ah biangeihnak a chiahmi cu ningzak tuk a si. A poi taktak a si' tiah a tial chih. President thing Nixon chan lio i political thangchiatnak an rak tonmi (watergate) tiang he a tahchun.
President Barack Obama chan lioah Director of National Intelligence James Clapper nih a chimmi cu 'President Trump ralchanh in cu bantuk thil tuahnak a um lo. Thimnak tuah lio zong ah a um lo. Campaign a tuah lio zong ah a um lo' a ti. Trump sualpuhnak hi a hmanmi a si ahcun James kutneh aa tel fawn lai.
A chim thanmi cu 'Obama cozah nih Trump ngiathlai an duh taktak ahcun Foreign Intelligence Surveillance Act (FISA) timi hnatlaknak an lak hmasa a hau a ti. Asinain Trump phone hrimhrim ah zeihmanh an chia lo. An tuah fawn lo a ti.
Obama biachimtu Kevin Davis zong nih a hmaan lo a ti ve. Obama a siah Inn Raang upa an siah US mipi cungah zeihmanh ngiathlainak an tuah lo. Obama sual an puhmi cu a hmaan lomi a si tiah nirukni ah khan a chim.
Fox News nih an tialmi Mark Levin nih a chim chinmi cu 'Trump nih sual a puhmi hi a hmaan ko lai. Obama a siah a riantuan pitu an siah hnulei puanzar phen ah an um lawng si loin Cozah chung in President Trump thlak an i zuam peng' tiah a chim. 'Hi vialte an tuahmi hi politics mit in an tuahmi lawng te an si' tiah a chim chih. Ref: TCP.