Ralkap in aa din cang i, Kawlram thonginn chungah a hrengtu General Than Shwe le Karen National Union hruaitu upa cu Naypydaw ah tonnak an rak ngei. Ni kum November ah an rak tong i naite lawng ah minung pakhat facebook ah an hmanthlak a rak chuak.
Hmanthlak ahcun Than Shwe cu orhlei kam ah a thu i, kehlei kam ah KNU hruaitu upa Saw Mutu Say Poe, KNU General Secreatry Padoh Kwe Htoo Win le Saw Roger Khin hna an thu. Hmanthlak a tartu hi U Ngwe Soe a si i, amah hi Dawei Princess Co. Ltd ah executive director a si.
A facebook ah a tial chihmi cu 'thathnemnak chuah pi seh ti duhsaknak he ka tarmi a si' a ti. Meeting lioah hmanthlak pakhat lawng thlaknak kan ngeihmi a si. Meeting hi keimah nih ka tuahmi a si i, KNU hruaitu nih voi tampi an nawl hnuah an i tonmi a si tiah a tial chih.
Suimilam pathum deng tiang an thu. Meeting hi ka sermi a si i, KNU chairman nih a chimmi cu 'politics kong ka chim lai lo. Ralkap kong ka chim lai' a ti. U Ngwe Soe hi KNU hruaitu he aa thei ngaimi a si. Than Shwe nih KNU chairman Saw Mutu Say Poe cu 'na kum zeizat dah a si cang' tiah a hal.
'Kum 83 le thla 4 ka si cang' KNU chairman Mutu nih tiah a leh. 'Keimah naak in tlawmpal te na no deuh. Keimah hi kum 85 ka si cang' tiah Than Shwe nih a chimh ve. U Ngwe Soe nih a chim ning ahcun politics kong an ceih lo nain kong dangdang tampi an ceih ti a ti. Ref: Irrawady news.