Iran President Hassan Rouhani cu Russian President ton ding in nikhatni ah Russia a tlawng. Middle East, Syria, chawlehthalnak le sipuaizi kong tbk an ceih lai tiah zumh an si. Iran le Russia pehtlaihnak hi a thawng chin lengmang. May thla in Iran ah thimnam a um cang lai.
Ramchung thimnak an tuah lai ah Russia a rak tlawn tami hna a si. An ram hnih in Syria President Bashar Assad zong a dirkamh taktami an si. Ralkap thazaang an bawmh i, diplomatic lam zong in an bawmh. 2011 ah ramchung buainak an ngei i, atu tiang ah 400,000 leng an thi cang.
Iran foreign policy kongah Russia hi ruahnak a pe lengmang tu hna a si. Iran le Russia cu hawikawm tha an si bantukin Middle East ah Russia aa cawlcangh khawhnak hnga Iran hi aa zuam lengmang. Middle East ah Russia a thawn khawhnak ding ah lam sialtu lengmang zong a si.
2013 ah President a rak si i, atu tiang Russian President Putin voiriat a ton cang. Russia Prime Minister Dmitry Medvedev zong March 27 ah a ton lai. Nizan zarhpini ah fak ngaiin dohtu pary lei sandahpiahnak an ngei. Russian police nih minung 500 leng an tlaih hna.
Cu chungah dohtu party hruaitu Alexei Navalny zong an tlaih i, ni 15 chung thongthlak ding tiah biakhiahpiak a si cang. Sandahpiah phung na buar tiah $ 300 leng dan an tat chih. Sandah an piahnak ruang cu PM Medvedev le hruaitu upa dang eihmur dohnak an tuahmi a si.
US zong nih Russia cozah fak ngaiin an vun phomh hna. Dohtu party sandahpiahnak nan khammi le nan tlaihmi hna cu democracy phung nan doh a si tiah US State Department biachimtu Tonner nih a chim. Ref: TOI.