Nikhatni ah New York ah mirang (vun raang) pa nih mi nak pa namte in a sawh i a thi. Police sinah a chimmi cu 'namte sawh cawnnak caah kan hmanmi a si. Times Square ah ka kal lai i mi nak dangdang zong thah ding in timhnak ka ngei ko rih tiah a chimh hna.
James Harris Jackson 28, cu nihnihni ah Manhattan Criminal Court ah a kong an ceih lio a si. Police nih an chimmi cu 'Timothy Caughman 66, hi a thim i vainam in voi tam ngai a sawh. A thisen he police station ah a rak ra i a tlu. Sizung ah a rannak in an thlik pi i caan rau lo ah a thi colh an ti.
Nam in a sawh khawh in Jackson cu a zam i, news ah a hmanthlak aa hmu hnuah amah tein police sinah aa ap than tiah police nih an chim. Police nih an chim thanmi cu 'mi nak a huat tuk hna. Vun raang nu pawl le mi nak pawl an i kawmh lengmangmi hrim hi a huat tuk hna a ti.
Baltimore in New York leiah Bus in a rat ah hin vainam le namte pahnih aa ken. Mi nak thahnak ah aa kenmi hna an si.
November thimnak tuah lioah vote thlaknak i aa tlaannak hman aa thlakmi ah a tialmi cu 'I Love America' tiah a tial. An innpa Jean Paul Chatham nih a chimmi cu 'mi tha ngai ah kan ruah ko. Aho hmanh harnak a pe bal hna lo' a ti.
New York khuabawi Bill de Blasio nih cun 'New York minung cungah hi bantuk dawhcah lo thil an tuahmi cu kan zapi cungah an tuah bantuk a si. Aho kan si ruang le zei bantuk minung kan si hmaanh ah kan lungrethei hlah seh' tiah thazaang peknak bia a chim. Ref: CNN.