Israel ralkap le Kawlram ralkap pehtlaihnak caan hi a sau cang. Lenglang in an i pektlaihnak theih an si lo nain an chung in pehtlaihnak an ngei lengmang. Ralkap lei zong in pehtlaihnak an ngei i sungthoh lei zong in pehtlaihnak an ngei tiah theih a si. Traning tiang in an pek hna.
Israel rallakp le Kawlral kap pehtlaihnak cu Tlangcung mi hna caah cun vanchiat taktak le tihnung taktak a si. Israel ralkap cu an fim tuk i Tlangcung mi uk khawhnak ding ah zeitluk in dah Kawl ralkap sinah ruahnak an pek cang hna lai timi theih a si lo.
Atu zong Kawl ralkap sinah a thli in hriamnam a zuar lengmangmi zong hi ngol cang u tiah Israel human rights group bu 10 nih Israel Supreme Court ah Israel cozah tazacuainak ca an tialmi cu an hnonpiak than dih hna. Kawl ralkap nih dong loin Shan le Kachin a kah lengmang.
Cun Arakhan State ah dong loin buainak a ser lengmang. Human rights dong loin a buar lengmang. Mah tluk in a sualmi Kawlram cozah sinah Israel cozah nih hriamnam zuar ti hlah seh tiah January 19, 2017 ah khan Israel Supreme Court ah tazacuainak ca an tial.
Tlangcung ram a doh lengmang hna pinah Arakan State ah human right a buar lengmang caah Israel hriamnam cawkter ti hlah u tiah Israel human right group bu 10 nih ca an tial. March 15 ah an lehmi hna cu 'Kawlram le Israel hriamnam cawk-zuarhnak kong cu politics kong a si caah kanmah nih kan tuah khawhmi a um lo' tiah an leh hna. Israel human rights bu cu an thachia ngaingai.
2015 ah khan Snr-Gen Min Aung Hlaing nih Israel a va tlawn hna i, Israel hriamnam company zeimawzat a va zoh. A hnuah Kawlram leiin upa pakhat nih a va tlawn than hna. An hmanthlak le hriamnam an cawkmi hmanthlak zong a rak chuak. Kawl ralkap training an pek lio hmanthlak zong an chuak.
Hi tluk in ram hnih thlithup pehtlaihnak le riantuanmi a lang ko nain Israel cozah nih an i theihter duh lo tiah Jerusalem-based human rights lawyer Eitay Mack nih a chim. Ref: Irrawady News.