President Trump nih Neil Gorsuch cu US biaceihnak sangbik (Supreme Court) caah a thim. Nizan nikhatni le nihnihni kha biahalnak an tuah i, Congress i Senate tam deuh nih an vote ahcun fehter a si lai. Supreme Court ah zei bantuk minung dah an um timi hi US caah cun a biapi tuk hringhrang.
Neil Gorsuch hi conservative ngai a si. Khrihfami zumhnak phung le lam ca hrimhrim ah a tha tuk lai an timi a si i, Trump nih Neil Gorsuch a thimmi cu an lungtling kho tuk hna. Asinain Democrats upa lei nih cun an doh ngaingai. An tei lai lo tiah an zumh. US cu conservative le Liberal dohnak inn bantuk a si cang.
Senate ah a tam deuh hi Republican an si ko caah fehter a si ko lai tiah an zumh. A theihhngalhnak a kau, a dingfel i, zumh awktlak a si. Trump hrimhrim nih cun 'soisel awk a um lomi a si' tiah a uar kho tuk. Republican lei upa zong nih an uar dih. Nikhatni le nihnihni i bia an hal i a lehmi hna zong zoh tikah an lungtling i, an zumh ngaingai.
Asinain President Trump nih biaceihtu a soiselmi kongah bia an hal i, a lungtlin lonak a langhter len ve. President Trump nih kan biaceihtu a soiselmi hna cu 'thachia ngai' ngai zong a si i, a poi zong a poi ngai' a ti ve. Tuan deuh lio zong ah a rak chim cang, asinain nizan mipi hmaiah a vun chim colh than.
A chimmi cu 'Federal biaceihtu ziaza, lungput, dinfelnak le zumh awktlak sinak an soiselmi hi cu thachia ngai zong a si i, a poi taktakmi zong a si zeicatiah zei rian dah an tuanmi a si ka theih. A riantuanmi hi zeitluk in dah a har timi ka theih. An temtuarnak in American a kan thawnter i a kan thatter deuhtu an si' a ti.
'President telh chih in na chimmi maw a si' tiah Sen. Richard Blumenthal nih a vun hal than i, 'aho poah telh' in tiah Gorsuch nih a leh. Ref: CNN.