Japan le South Korea a tlawn hnuah Taluk ah a lan i, atu hi North Korea kongah Taluk he an i suk cuahmah lio a si. US Secretary of State Rex Tillerson nih Taluk cu North Korea hi a chak nan rengh deuh ding a si a ti hna; an lehmi cu US zong nan lu hi ti kik nan toih deuh a hau ve an ti hna.
Tu ni (nirukni) ah Taluk a phan. Taluk leiin Wang Yi he an i tong hmasa i 'NorthKorea kong hi ceih ding kan ngei ti lo. Cabuai cungah kan duhmi paoh kan i thim khawh cang. Ralkap in kap cang hna u sih kan ti ahcun a si kho cangmi a si' tiah a chimh.
'North Korea he kan i sukkhaknak hi a tihnungmi level ah a phan cang' tiah a chim chih. President Trump nih twitter in ca a rak tial chih ve. 'North Korea ziaza hi a chia chin lengmang cang. Kum tam tuk US lente a kan celh pi cang. Taluk nih North Korea cungah a tuahmi a tlawm tuk. (A cawnpiak hnga tluk in a cawnpiak lo a ti).
Taluk leiin Wang Yi nih 'North Korea nuclear le missile kong hi diplomatic lam in kan phisin a hau. US zong nan lungthin nan daihter deuh a hau. A hmanmi biaruahnak lam ah US zong nan rat than a hau' tiah a leh. Asinain US lei nih cun kum tam tuk lente a ka celh pi cang an ti ve.
Tuan deuh zong ah diplomatic lam sawhsawh hi san a tlai ti lo tiah Japan a um lioah Tillerson nih a chim cang. Kum 20 leng kan i zuam cang i kan hlawhtling lo. North Korea cungah kan lungthin zong a sau kho ti lo tiah a chim.
Zarhpini ah President Xi Jinping he an i tog rih lai. An i ceih dingmi a tam lai tiah zumh a si. President Trump le Xi zong a ra laimi April thla chungah US Florida ah tonnak an ngei lai. Ref: CNN.