VOA News nih President thing George W. Bush biaruahnak an ngeih. President rian in aa dinh hnu cun mipi theih in bia a chim tuk lo. 'Kaa i dinh cang hnuah cun langhsar tuk zong a rem ah ka ruat ti lo' a ti.
A chim thanmi cu 'kan i dinh hnuah bia chim lengmang zong hi a rem ti lo. President (Obama & Trump) nih a rem an ti ning in ram an hruaimi kha a thami a si ko. Va tlangtlak ve lengmang ve hna kha ka rian zong a si ti lo' a ti. Mah ruangah ahcun President thing Bush hi bia a chim tuk lo.
Naite lawngah Trump nih 'Media hi American mipi ral nan si' a ti hna hnuah Bush nih media biapitnak a vun chim. Media a thawn ahcun kan democracy a thawng lai. Media zalon hi a biapi tuk a ti. Trump cu a soisel tuk lo.
Asinain Trump president a tuan hnu in US hi a buaimi a vun lo pah. Asinain President thing Bush nih cun 'a buai deuh ti awk in ka ruat lo' a ti. 'Kan i thencheu deuh ti zong in ka hmu lo. 1960 hrawng zong ah kan ton ngaimi thil an si ko. College ka dih ah khan kan ram buainak kha atu naak in a zual deuh' tiah Bush nih a chim.
A caan ahcun kan ram hi aa thencheu ngaimi a lo tawn ko, asinain sersiam than khawhnak lam zong kan ngei than kho lengmang i, sersiam than khawhnak thazaang zong kan ngei than kho lengmang. Kan ram hmailei caah ruahchannak ka ngei lengmang ko tiah a chim. Ref: VOA News.