Campaign lioah kan hrawh hrimhrim lai tiah Trump nih a rak doh lengmangmi Obamacare cu zahan zarh Congress i House ah an ceih i, an hlawhtling kho lo. President Trump nih a bochan ngaimi House biachimtu Paul Ryan zong a rian phuah ding in timhnak a ngei tiah biachokvai a um cang.
Nirukni zing ah Fox News leiin Jeanine Pirro nih fak ngaiin House biachimtu Paul Ryan a phomh len. President Trump nih twitter in ca a rak tial i, 'Pirro biachim hi nan ngaih cio ding a si' a ti colh. Trump catial nih mipi lungthin a tuaitam ngaingai cang. Trump nih Paul Ryan rian a phuah lai tiah an ruah cang.
Pirro nih hitihin Paul Ryan cu a phomh, 'Paul Ryan nih President Trump a deuh cikcek. Paul Ryan cungah mawhchiatnak a um dih. Trump nih politics a thei tuk rih lo. Paul Ryan cu poltics a thei tuk cangmi a si. House ah zeitin dah Trump Health Care ka chuah pi lai ti a theimi a si. Asinain Trump le a cozah an deuh diam hna tiah a chim.
Pirro nih a chim thanmi cu 'Obamcare thah loin Trump Health Care tu an thah i, Congress i democrcts pawl an ral a thatter chin lengmang cang hna lai. Cucaah Paul Ryan cu a rian in aa dinh hrimhrim a hau' tiah a chim. Pirro biachimmi cu Trump nih 'Pirro biachim hi an zoh cio ding a si' tiah twitter in vun thangthat colh.
Mah ruangah mipi nih an ruahmi cu President Trump nih House biachimtu Republican Paul Ryan hi a rian in a phuahter lai tiah an zumh cang. Pirro nih a chim thanmi cu 'American mipi nih Paul Ryan santlaih lonak an philh kho ti lai lo. President zong nih a philh ti lai lo' a ti. Ref: TCP.