March thla 16 thok in a ra laimi ni 120 chung Refugee kham chungnak min a thutmi le ni 90 chung Muslim ram ruk kham chungnak min a thutmi cu a nun manh hlan March 16 hlan deuh ah Hawaii State Federal biaceihnak nih an thahpiak than. Trump a lungdong ngai cang.
A herh ahcun Supreme Court tiang kan phan cang lai a ti. January 27 ah khan a voikhatnak a rak thut i Washington i Seattle biaceihnak nih an rak thahpiak cang. A lungdong rih lo i a voihnihnak a vun thut than i, a voihnihnak ahcun a khammi ram chungin Iraq a telh ti lo. March 16 in a nung lai i, a ra laimi ni 120 le 90 chung tiang a nung ding an si.
Asinain Hawaii State Federal Court nih an thahpiak than. A minthutnak an thahpiak hnu caan tlawmpal ah President Trump cu Tennessee i Nashville ah bia a chim i, 'tihnungmi dirhmun ah kan um timi cu a fiang ko. Kan upadi zong a fiang ko. Ka minthut zong a herh caah ka thutmi a si ti a fiang ko. Kan mipi himnak caah ahodah kan ramchung ah kan luhter lai i luhter lai lo timi nawl ka ngei ko' tiah a chim.
Asinain a ruah ning lo tuk in an thahpiakmi cu a lungfak ko. President Trump nih cun 'karhlei an laam tuk' a ti hna. A herhnak tiang kan phak pi cang lai tiah thinhung ngai in a chim cang. US biaceihnak sangbik ( Supreme Court) zong kan phan cang lai a ti. Hawaii biaceihnak nih an chimmi cu 'Trump minthut nih 'tourist a kham tuk hna lai' an ti. Hawaii Island tangka hmuhnak hi tourist hna sinin a si ve.
Hawaii ah khuasami Muslim ca zong ah harnak an tong tuk lai zeicatiah Iran, Libya, Somalia, Sudan, Syria le Yemen ah chungkhar tampi an ngei hna tiah a chim chih. Washington state Attorney General Bob Ferguson zong nih 'thawngpang tha tuk hringhran a si' a ti. State tampi le bu tampi nih lungthin khat in kan teinak a si tiah a chim chih. Ref: VOA & BBC.