Nithum chungah Israel nih Syria voithum bak te a kah. Syrian ralkap si loin Hezollah tapung sinah an pekmi hrimanam an kahpiak hna. Nilini zantim ah vanlawng pali nih Syria ramchung ah an phomh hna i, zarhpini zing ah drone in an phomh than hna.
Asinain Israel ralkap nih nikhatni ah an chimmi cu Syrian ralkap nih kan drone a kah ko tiah an chim. An kahnak hi Syrian Golan Heights ah a si. An kahmi hmanthlak zong Hezbollah tapung nih an social media ah an tar len hna.
Israel lei upa nih an chimmi cu 'kan drone an thlakmi chungah thilthup information an lakmi a um lo' an ti. An drone an thlakpiak hna hlanah nilini zantim ah Israel nih Hezbollah hriamnam an kah hna i, Syria ralkap nih missile in an rak kah len ve hna.
Israel lei upa nih an chimmi cu missile tam ngaiin an kan kah, asinain a kan khen lo an ti. Mah hnu cun Israel le Syria karlak ah huatnak a linsa chin lengmang cang. A luan cia kum ruk khan Syria ramchung buainak a um hnuin kap hnih karlak ah buainak linsa ngaiin an vun ton a si.
Nizan zarhpini ah Israel drone nih Syrian Golan Heights ah a kal cuahmahmi motor a kah i, a mongtu pakhat a thi. Syrian ralbawi sang pakhat a si an ti.
Israel Defense Minister Avigdor Liberman nih zarhpini i an kah hna hlanah a chimmi cu 'Syria nih a missile in kan vanlawng a kah than ahcun an ram runvennak system vialte kan hrawh dih cang lai a ti. Ref: TOI.