ISIS nih kan khualipi an timi Syria ram Raqqa ah President Trump nih a ralkap 400 a thlah than cang hna tiah US official nih nilini ah an chim. Syria ah US ralkap zeizat dah a hlanah an um cang timi theih a si lo. Ralkap lei upa zong nih an ralkap zat a ummi phuan an duh lo.
Iraq le Syria ah ISIS a domi Col. John L. Dorrian nih a chimmi cu 'Raqqa hmukhur ISIS doh ning cang khua kan khan cuahmah lio a si. ISIS dohnak caah a hleiin ralkap 400 kan i chap i, kan hawile Syrian ralkap tampi an bawmh hna lai tiah a ti. ISIS kan doh ning cu Iraq ISIS kan doh ning le Syria ISIS kan kah ning aa khat ko lai tiah a chim chih.
Iraq ah cun Iraq ke ralkap nih tanglei in an phomh hna i, cungleiin US le an hawile nih raltuknak vanlawng in an phomh chih hna; Syria zong ah US hawi Syrian ke ralkap nih tanglei in an kah hna lai i cungleiin raltuknak vanlawng in kan phomh chih hna lai, cun US ralkap nih ruahnak le hmunhma zoh thiamnak kan chim chih fawn hna lai a ti.
Obama chan in raltuknak vanlawng in an phomh len cang hna. A herhnak hmun le zawn ahcun helicopter zong in an phomh len cang hna. Raqqa zong ah cu thiamthiam cun an phomh than hna lai. US ralkap upa Gen. Joseph L. Votel nih nilini ah a chimmi cu kan ralkap dang an herh rih lo ko ahcun kan thlah than ko hna lai a ti.
Iraq khuapi Mosul zong ah dohnak a dai rih lo. Iraq khuapi Baghdah in chaklei khua pakhat ah thitumnak puai an tuah i, theih lo minung nih bom an puah hna i minung 26 an thi i, tam ngai an i hliam. ISIS an si ko lai tiah cozah lei biachimtu nih nilini ah a chim. Iraq le Syria ah tapung cawlcanghnak a dai kho hlei rih lo. Ref: NYT.