Israel Prime Minister Benjamin Netanyahu cu Russia ah a tlawng i Russian President Putin he Moscow ah tonnak an ngei. Iran kong theo cu chim lo awk a that lo caah PM Netanyahu nih Putin cu a thawh i, Bible tuanbia siangapahrang Esther chan Persia (Iran) kong a ceih pi.
A luan cia kum 2,500 lio ah khan Persian ralbawi (Hamam) nih Jews miphun thahnak khua a rak khang, asinain an hlawh a rak tling lo. Kha lio i Jews miphun nih ruah loin teinak kan hmuhmi conglawmhnak (Purim Puai) kha a ra laimi nirukni zan in ka conglawmh cang lai. Asinain zoh hmanh, nihin tiang ah Iran (Persia) nih Israel hrawh ding in aa zuam peng a ti.
An kaa lawng chim hmanh an lungtling lo i, an missile cung tiang ah Israel hrawhnak ca an tial tiah biatak ngaiin Putin cu a chimh. President Putin nih awcawi dawh deuh in a vun leh ve. Iran cu Russia hawi tha ngai a si tikah Russia nih Iran cungah Israel duh phun in biachim awk a tha lo, asinain Putin nih cun 'atu ahcun chan dang ah kan um cang. A luan cia tuanbia ah um ti hla' a ti diam.
Chan dang kan ummi kong tu kan chim lai' tiah a leh. ISIS le a dangdang kong an ceih len hna. ISIS dohnak ah kap hnih raltuknak vanlawng sukkhakter lo ding le ralkap pehtlaihnak kong tbk an ceih, cun Netanyahu nih biapi ngaiin a chim thanmi cu Syria ISIS hi Iran nih an hmun rolhter lo ding hrimhrim na kan zuampiak lai a ti.
Prime Minister Netanyahu nih cun Jews miphun rungvengtu ah aa ruah bantukin Iran kong hi biapi ngaiin a ruah lengmang. Iran le an nuclear program hrimhrim hi dong loin a doh peng. Asinain Russia nih cun Iran sinah hriamnam thatha a zuarh lengmang. Naite zong ah Iran sinah a tha taktakmi raltuknak vanlawng kahnak S-300 anti-aircraft system a zuarh than hna.
Nirukni zan in cun Purim puai an tuah cang lai. Nikhatni tiang an hmang lai. Hamam nih Jews miphun thahnak khua a rak khan i, amah le a chungkhar tu an thahnak le Jews miphun teinak an hmuhnak puai (Purim) philh lonak conglawmh ni a si. Iranian Foreign Minister Mohammed Javad Zarif nih cun 'na palh. Esther cauk na rel ahcun Jews miphun a khamhtu hna kha Iran siangpahrang Ahasverous a si tiah a rak leh ve. Ref: TOI.