US le ram 40 hrawng cu UN meeting ah kan kai lai lo tiah US ambassador Nikki Haley nih nikhatni ah a chim. UN ah nuclear khamnak kong ceih ding timhnak an ngei i, US nih cun kan tel pi hna lai lo tiah a thanh cang.
Vawleicung ah nuclear hriamnam kan zohter a hau cang tiah ram zeimawzat nih UN ah ceih ding chuah pi an timh. Asinain UK, France, tbk hna nih cun US an dir pi. Anmah hi nuclear ram thawngthawng an si ve hna.
Haley nih a chimmi cu 'nucan pakhat dirhmun ah a ummi zong ka si i, fanu zong a ngeimi ka si. Vawleicung hi nuclear hriamnam loin um u sih ti hi ka duh bikmi a si. Asinain biatak he kan um a hau' tiah South Carolina Governor thing nih a chim.
A chim thanmi cu 'nuclear khamnak kong ceih u sih law North Korea tbk ram nih an cohlang lai maw? An cohlan ko lai tiah nan ruat maw?' tiah a hal hna. A chim duhmi cu 'UN ah nuclear khamnak kong kan ceih hmanh ah North Korea ram tbk nih an zul hlei lai lo i, kan ceihmi hi santlai lo thiamthiam a si ko lai a ti.
Ni kum zong ah an rak ceih cang i Obama cozah zong nih an rak duh lo; Russia le Taluk zong nih an rak duh lo. UK ambassador Matthew Rycroft zong nih 'kan ram zong an i tel lai lo. Nucear khamnak nih thathnemnak a chuah pi lai timi kan zum lo' a ti.
President Trump nih Reuters ah a rak chimmi cu 'vawleicung hi nuclear hriamnam loin umter ka duh, asinain nuclear hriamnam tam bik ngei kan si lai' a rak ti. Ref: CNN.