Kan hnu zarh ah khan Los Angeles ah Hillsong Concert an tuah i hlasak thiam Selena Gomez zong a kai. 'Nobody' timi hla zong a sa ve. 'Pathian ka thangthat lioah midang zong nih ka hmu cio hna seh' tiah a chim. Gomez nih Jesuh Khrih a zumhnak hi a thawng chin lengmang an ti.
'A chimmi cu 'tu zan concert hi concert sawhsawh lawng a si lo. Hillsong concert lawng a si lo. Stage cungah ka kai i, nan caah hla ka sakmi tiang lawng hi a si lo' tiah mipi hmaiah a chim. A chim nolhmi cu 'tu zan concert cu zei dang vialte naak in a biapi deuhmi Pathian kan pehtlaihnak a si' a ti hna.
Minung pakhat nih twitter in bia a hal i, 'Nobody' hla hi zei sullam dah a si' a ti. Gomez nih a lehmi cu 'Pathian' tiah a leh. A tial chihmi cu ''Nobody timi cu Pathian kong ka chim duhnak a si' a ti. US ramchung kip i Hillsong concert tuahnak ah Gomez hi aa tel lengmang cang.
Hillsong hla a uar cemmi hna cu 'Hosanna' le 'Soon' timi hna hi an si. Hillsong hlasatu zong a si i hlaphuahtu zong a simi Brooke Fraser hi ka uar tuk a ti. Khuaruahhar a si. Kan i theih khawhmi cungah kaa lawm tuk tiah a chim. A hlasakmi kip ngaih ka duh dih hna tiah a chim chih.
Hillsong Praise & Worship zong ka duh tuk. Pathian kan vun thangthat hnu cun ka nunnak hi thangthatnak in a khat dih kho lengmang. Khrihfa ka si bantukin ka lungthin zong Hillsong leiah a kal chin lengmang cang. Hillsong Pastor cung zong ah kaa lawm tuk tiah a thangthat ngaingai hna. Ref: TCP.