Zarhpini ah United Airline (vanlawng) chungah minung pakhat (Taluk pa) cu a duh lo buin an hnuh i lengah an chuah. A kaa le a hnar tiang in thisen an chuah. A cheu nih an chimmi cu security pa nih a thongh an ti; cheukhat nih an chimmi cu 'amah tein aa sukmi a si' an ti.
Louisville in Chicago leiah a zuang dingmi a si i, vanlawng thutnak an khat dih cang. Vanlawng chungah riantuan thutnak a ting lomi an um. Vanlawng chung riantuantu nih aa citmi mipi cu 'nanmah lungtho tein thutnak a lawnter khomi nan um lai maw? Nan tiket man zong kan in pek than ko hna lai' an ti hna. Khulrang in hmun dang ah vanlawng riantuantu kal an duh caah poipang ngaiin mipi an nawlmi hna a si.
Asinain ahohmanh nih lungtho tein thutnak kianh aa timmi an um ti lo. Vanlawng riantuantu nih an tuahmi cu 'aa citmi vialte chungin minung pali cu computer system in an min an thim hna. Minung pali min an thimmi hna cu nan chuak than lai tiah an chimh hna i, minung pali chungah minung pathum cu lungtho tein an tho i an chuak ziar ko.
Asinain minung pakhat (Taluk pa) cu a chuak duh ti lo. Mi zaw zoh ding a ngeimi ka si i, caan saupi a la kho ding ka si lo tiah a dirhmun tha tein a chimh hna. A thutnak kianh a duh ti hna lo caah security minung an auh hna i, kum 60 a simi Doctor pa cu an hnuh i lengah an chuah pi. An chuah pinak ah fak ngaiin aa khawn.
A kaa chung he a hnar chung he thisen an chuak. A kee le a kut in an cawi i an chuah pi. 'Ka duh lo. Tlun ka duh cang' tiah a au len, asinain an chuah pi chih. 'Ka that lawlaw u' ti tiang in a auh hna. Leng an chuah hnu tiangah a vun pah chih hna i luh aa timh. Zoh ahhin zaangfak taktak a si. Mipi hrimhrim an thinhung tuk. Cu tluk United Airline thlachiat ruah hna lo cu tiah fak tuk in soisel han.
Vanlawng aa citmi Jade Kelley nih a chimmi cu 'a dawng tein ka hmu lo nain an chuah lio i aa khawn i a ai thawng nih a ka zelh peng. Ka hnathlam chungah a rak thang than lengmang. Amak ko. Zan zong kaa hngilh kho lo' tiah a chim. Social media kip cu United Airline nih Taluk pa an tuahnak kong le hmanthlak le video lawng te an khat.
United Airline kan boycott lai tiang in an ceih. Ka nunchung kaa cit ti lai lo tiah tampi nih an chim. Mipi an thinhung kho tuk. Tukvelh duh ah nan tiket nan i cawkter a timi zong an um. A hmutu pakhat nih a chimmi cu 'vanlawng aa citmi ahohmanh a siaremmi le aa nuammi an um lo' a ti. A chuahtu officer zong a rian in an dinhter.
A hnuah United Airline chairman Oscar Munoz nih ngaihthiam halnak bia a chim. Asinain an company riantuan palhnak a chim lo. Kan phung a si ko. Hi bantuk thil poipang kan ton tikah aa citmi chungin thutnak lawnter ding hi kan phung a si ko. Tutan hi hmun dang ah kan riantuantu a kal ding an si caah khulrang in kan tuahmi a si a ti. Ref: CNN.