United Airline chungin hramhram in Taluk Dr. David Dao an chuah man cu an tuar ve hrimhrim a hau. Zeitin dah mipi leiin lehrulnak a um i, zeitluk in dah an sipuazi a tlak manh timi le zeitin dah chungkhar leiin lehrulnak a um te lai timi zoh phu taktak a si.
US lawng si loin vawleicung ram kip tiang khuaruahhar in a tuahtu tuahsernak thalo taktak a si. Atu tiang ah thil cangmi kan zoh lai. Dr. David Dao a chuahtu offiicer an rian an dinhter, United Airline chairman CEO zong fak tuk an phomh i, zeitiang dah a tuar te lai, cun mipi thinhunnak a linsa chin lengmang rih.
Nihnihni ah aa citmi minung pakhat John Klaassen nih a chimmi cu 'a nemnak tein biaruah hna seh law hi tiang hi an phan lai lo' a ti. Atu cun an mobile phone in vawleicung hram kip nih an hmuh dih cang. Aa citmi mipi nih an au hnawh cuahmah ko bu hna in a kut le a ke in an tlaih i, thisen he an chuah pi. Taluk hrimhrim an thinhung tuk.
An chuahmi pa hi Dr. David Dao a si. Vanlawng aa citmi hna hi a hleihluat in minung an hlei ahcun an duh lo buin chuahter khawh an si. Asinain nizan an tuah bantuk thil khan si loin a nemnak tein nawl hna i anmah lungtho in chuahter hna ding an si. 2015 lawng hmanh ah 46,000 hrawng an rak chuahter hna. Thazaang hmang in an chuahter.
Airline nih a hleiin tiket an zuar lengmang zecatiah vanlawng zuan lai ah a rak phan kho lomi le a tlaimi an um lengmang. Kha bantuk hna ai ah khan a hleiin an zuarhmi hna nih an thutnak an lak lengmang. Nizan thil kongah khan cu vanchung riantuantu pali hi hmun dang ah riantuan ding an ngei i, thutnak pali an herh.
Cu tikah tiket a ngei cio dihmi hna cu nan thutnak lawnter than u an ti hna. A dang pathum cu an duh lo buin an tho i an chuak. Taluk pa cu a duh lo. A duh lonak ruang cu nikhatni hlan tiang paoh cu vanlawng a zuang ding a um lo timi a theih. Mah ruangah ka tlai awk a tha lo. Mizaw zoh ding ka ngei tiah a nawl ve hna.
An nawl deuhdeuh tikah a duh lo chin lengmang ve. 'Tlai awk ka tha hrimhrim lo' tiah a nawl chih ve hna. Aa citmi pakhat nih a chimmi cu 'biathli an chimmi ka theihmi cu Taluk a si caah chuahter ko u sih' tiah an chimmi ka theih a ti. Atu hi Chicago sizung ah a um lio a si, zeihmanh kan chim rih lai lo tiah a chungkhar le a sihni hna nih an chim.
Mipi leiin lehrulnak an tuah thanmi cu an United Airline credit card an hrawh dih hna. 'Ka United Credit Card thar. An vanlawng in ka zuang ti lai lo' tiah Josh Perfetto nih a hrawh dih. United Airlien market hrimhrim a tla tuk manh. $1 billion a tla manh cang an ti. Ref: CNN News.