North Korea state newspaper Rodong Sinmun US nih an vun phomh than hna. Nuclear ral thawhter duh ah Australia hmang in nan kan tuaitam. Australia ah ralkak eksaisai nan tuahmi hi a sawhsawh a si lo. Ralpi Pahnihnak hnu ah a ngan bik a si tiah an vun phomh than hna.
An tial thanmi cu 'America hi nuclear ral thawhter duh ah a molh in nan molh cang. Nulcear raltuknak nan porter chin lengmang cang' tiah fak ngaiin an tial. Nikhatni ah an tial thanmi cu 'America nih nuclear ral thawhter duh ah ramdang ah raltuk ding in timhnak nan ngei' an ti.
An chim duhmi cu naite ah US le Australia ralkap eksaisai an ngeihnak kha an chim. North Korea nih Australia zong fak ngaiin an phomh chih hna. Mitcaw bantukin US lam nan zulh lengmang ahcun kan nuclear thinhunnak na tuar te lai ti tiang in an phomh chih hna.
Australia defence minister Christopher Pyne nih a chimmi cu 'US le Australia ralkap eksaisai kan ngeihmi cu zeidang ruangah a si lo. Caan sau pi chung kan i pehtlahnak chungah aa tel pengmi kan policy pakhat a si. North Korea thinhunter duh ah kan tuahmi hrimhrim a si lo' tiah a chim chih.
'Ralkap hrocernak cu kan duhmi zong a si lo. North Korea zong dawhcah tein cawlcangh seh ti kan duh, ram pakhat a si bantukin upat tlak tein um ve zong hi a biapi. Missile le nucler program in US, South Korea le Japan hi hro lengmang ti hlah seh ti zong kan duh' a ti. Ref: The sun.