North Korea nuclear hrocernak hi a dai kho ti lo. An linsa peng. Australia le US ralkap eksaisai tuahnak nih a thinhunter i, South Korea leiah a ralkap tilawng a thlah thanmi nih a thin a hunter than. North Korea hi cangai khur chung hraang bantuk a si cang.
US zong nih Taluk lawng te a zoh ve cang. North Korea hi na rengh deuh a hau. A linsa chin lengmang lai tiah President Trump nih Taluk President Xi cu atu le atu in a auh cang. Nizan ah Taluk nih North Korea sinah a pek tawnmi petrol zong a rengh cang tiah report nih a chim.
Taluk nih fak deuh in a rengh hna ahcun thla thum chung hmanh an nung kho lai lo ti a si. Atu zong Taluk nih North Korea cu a tlai tuk hlanah hnulei na kir a hau. Hrocer bu le thinhun buin hmailei fong lengmang ti hlah a ti than cang.
Taluk media ngan bik Global Times nih cun 'na tuar tuk te lai. A voiruknak nuclear na hneksak cicet ahcun kir than awk a thami hmun ah na um te lai lo. Lentecelh na thok hnu cun na kir kho ti lai lo' tiah fak ngaiin a tial. A tial thanmi cu 'a hneksak taktak ahcun UN dantat lawng si loin an kah khawh cangmi a si' a ti.
'Taluk nih North Korea renghnak kongah hin a bi tukmi ri chungah a um. Kim Jong-un hi a kham kho lai lo' tiah a tial than. Japan le Taluk an i cuhmi rili ah an chiahmi Taluk ralkap sinah President Xi nih timh cia tein um ding in ralrinnak an pek hna hnuah Global Times nih a tialmi an si. Ref: The Express.