Nihin hi North Korean ralkap dirh a kum 85 tlinnak a si i, ropui taktak in conglawmhnak puai an tuah. Ralkap thazaang le hriamnam thazaang langhternak zong an tuah i, kum dang vialte naak in a ropui cem a si lai tiah South Korean official nih an chim.
North Korea hruaitu thing zong a si i, a thi cangmi Kim II Sung le Kim Jong-un milem upat peknak zong an tuah. Ralkap he mipi he pangpar an i put hna i an milem hmaiah upatnak an tuah hna.
An tuahnak hmun hi tuan deuh i missile an hneksak i a tlolhnak hmun ah a si. North Korea ralkap lei upa pakhat Pak Yong-sik nih ralrin peknak a chimmi cu 'ralrinnak kan pek lengmang ko buin kan ral nih ralkap an i thim i a kan kah ahcun kan ralkap nih an hloh dih cikcek hna lai' a ti.
A chim thanmi cu 'kan nuclear hriamnam in an umnak hmun le hram vialte kan choih dih hna lai i, vawlei hrimhrim in kan hloh hna lai' tiah fak ngaiin a chim. An ralkap camtuak ni ah an hriamnam thazaang an langhtermi zong South Korea leiin an rak zoh ziar ve ko hna.
North Korea ramchung media Rodong Sinmun nih a tialmi cu 'US le an hawile nih zeirel loin a kan kah ahcun fak taktak in kan phomh hna lai. Vancung in kan kah hna lai; vawlei zong in kan kah hna lai, rili zong in kan kah hna lai; rili chung zong in kan kah hna lai' a ti.
Nihnihni ah US raltuknak tilawng nuclear phurtu USS Michigan zong South Korea rili Busan ah an phan cang. US raltuknak vanlawng phurtu le a dangdang umnak tiang a rak phan lai. 'North Korea nih a kan hrocernak hi ngol cang seh. A ngol lo ahcun fak tuk in lehrulnak kan tuah lai tiah South Korean upa Kim Hong-kyun nih a phomh ve hna. Ref: USA Today.